बिहारमध्ये पुतण्याला धक्का; काकाची पक्षाच्या नेतेपदी निवड

बिहारच्या राजकारणात सोमवारी उलथापालथ झाली आहे. ज्येष्ठ रामविलास पासवान यांच्या पश्‍चात लोक जनशक्ती पक्षात (एलजेपी) फूट पडली आहे. पासवान यांच्या निधनानंतर पक्षाचे सर्वेसर्वा असलेले त्यांचे पुत्र चिराग पासवान यांच्याविरोधात पक्षातील खासदारांनी बंड पुकारले. या गटाचे नेतृत्व रामविलास पासवान यांचे कनिष्ठ बंधू पशुपती कुमार पारस यांच्या हाती सोपविण्यात आले आहे. लोक जनशक्ती पार्टीच्या पाच बंडखोर खासदारांची मागणी लोकसभा सभापतींनी स्वीकारली आहे. त्यामुळे चिराग पासवान यांचं लोकसभेतील संसदीय पक्षाचं नेतेपद गेलं आहे. पशूपती कुमार पारस यांची नेतेपदी निवड झाली आहे. लोकसभा सचिवालयाने याबाबतचा आदेश जारी केला आहे.

रविवारी (ता.१३) रात्री एलजेपीच्या या नाट्याला सुरुवात झाली होती. सोमवारी रात्री अखेर चिराग पासवान यांच्याविरोधात बंड करून त्यांचे काका पशूपती कुमार पारस यांची नेतेपदी निवड केली. या बंडामुळे बिहारच्या राजकारणात उलथापालथ झाली आहे. बंडखोर खासदारांनी नेतेपदी निवड करताच पारस यांनी ‘मी पक्ष फोडलेला नाही, तर वाचवला आहे’, अशी प्रतिक्रिया व्यक्त केली. पारस हे हाजीपूरचे खासदार आहेत. या बंडानंतर त्यांनी बिहारचे मुख्यमंत्री नितीश कुमार यांची प्रशंसा केली. ‘‘नितीश कुमार हे एक चांगले नेते आणि ‘विकास पुरुष’ आहेत’’, असे ते म्हणाले.

केंद्रीय मंत्रिमंडळाच्या विस्ताराआधी ‘एलपीजे’त पडलेल्या फुटीमुळे अनेक बदल होणार असून हा पक्ष मंत्रिमंडळात सहभागी होण्याची शक्यता वर्तविण्यात येत आहे. चिराग पासवान यांच्या वर्तणुकीमुळे पक्षाचे खासदार व नेत्यांमध्ये गेल्या काही दिवसांपासून नाराजी होती. पशुपती पारस यांनी संयुक्त जनता दलाने (जेडीयू) पक्षाला साथ द्यावी, असा प्रयत्न सत्ताधारी पक्षाकडून कोरोनाच्या दुसऱ्या लाटेपूर्वीही झाला होता.