NEET Paper Leak: पाटण्यातल्या ज्या शाळेत 'नीट' परीक्षेचे प्रश्नोत्तरं पाठ करुन घेतले, त्या घरमालकाची मुलगीसुद्धा MBBS

NEET Exam : नीट पेपर लीक प्रकरणाध्ये रोज नवनव्या गोष्टी समोर येत आहेत. यातच पाटण्यामध्ये एक विचित्र प्रकार पुढे आला आहे. शहरातल्या खेमनीचक भागात ज्या लर्न अँड प्ले शाळेत परीक्षार्थ्यांकडून नीटची प्रश्नपत्रिका पाठ करुन घेतली होती, त्या घरमालाबद्दल एक धक्कादायक माहिती पुढे येत आहे.

जी माहिती मिळाली आहे, त्यानुसार घर मालकाची मुलगी प्रभात रंजनची मुलगी एमबीबीएस पास आहे. आता प्रश्न असा उपस्थित होतोय की, हा केवळ योगायोग आहे की नीट पेपर लीक प्रकरणाचं तिच्याशी कनेक्शन आहे?

नीट परीक्षा गैरव्यवहार प्रकरणातला माफिया संजीव मुखियाचा मुलगा डॉक्टर शिव हासुद्धा एमबीबीएस पास आहे. तर नीट पेपर लीक प्रकरणातील आरोपी सिकंदरची मुलगीसुद्धा एमबीबीएस पासआऊट आहे.

सिकंदर हा बिहार सरकारमधील ज्युनियर इंजिनिअर आहे. यासह प्रभात रंजनच्या मुलीनेही एमबीबीएस केलेलं आहे. प्रभार रंजनच्या खेमनी येथील घरात २० ते २५ विद्यार्थ्यांना ४ मेच्या रात्री युजी प्रश्न आणि त्याचे उत्तर पाठ करुन घेतले होते.

सूत्रांच्या माहितीनुसार, नालंदा येथील संजीव मुखियाचे प्रभात रंजनसोबत जवळचे संबंध आहेत. पोलिस सूत्रांच्या माहितीनुसार, संजीव रंजन मुखियाच्या सांगण्यावरुनच प्रभात रंजन याने आशुतोषला भाड्याने घर दिलं होतं. पोलिसांच्या सांगण्यानुसार प्रभात रंजनची भूमिका संशयास्पद आहे. त्यामुळे त्याची चौकशी सुरु आहे.