कोरोना गेल्या 100 वर्षातील सर्वात मोठं संकट : पंतप्रधान मोदी

नवी दिल्ली - पंतप्रधान नरेंद्र मोदींनी (PM Narendra Modi) गुरुवारी पुन्हा एकदा कोरोनाच्या (Coronavirus) संदर्भात देशातील वेगवेगळ्या जिल्ह्यांच्या जिल्हाधिकाऱ्यांसोबत (District Collectors) बैठक घेतली. व्हिडीओ कॉन्फरन्सच्या माध्यमातून पंतप्रधान मोदींनी जिल्हाधिकाऱ्यांसोबत संवाद साधला. यावेळी मोदी म्हणाले की, कोरोनाची साथ ही गेल्या 100 वर्षातील सर्वात मोठी आपत्ती आहे. कोरोनाने तुमच्यासमोर आव्हाने आणखी वाढवली आहेत. तुम्ही जिल्ह्यातील सर्वात मोठे योद्धे आहात आणि गावागावात असा संदेश द्यायचा आहे की गावाला कोरोनामुक्त ठेवायचं आहे. आपल्याला बराच काळ जनजागृती करावी लागणार असल्याचंही मोदी म्हणाले. (pm-narendra-modi-meeting-with-10-states-district-collectors-on-covid-19-situation)

देशात लसीकरण मोहिम सुरु असली तरी मोठ्या प्रमाणावर लस वाया जात आहे. त्याबद्दल चिंता व्यक्त करताना मोदी म्हणाले की, कोरोना लस वाया जात असून ते थांबवायला हवं. एक लस वाया जाणं म्हणजे एका व्यक्तीला ती मिळणार नाही. यामुळे आपण जीवन सुरक्षा कवच देऊ शकणार नाही. म्हणूनच कोरोना लस वाया जाण्यापासून रोखायला हवं.

लहान मुलं आणि तरुणांमध्ये कोरोनाचा धोका असून त्याबाबत बोलाताना मोदींनी म्हटलं की, व्हायरसच्या म्युटेशनमुले तरुण आणि मुलांसाठी चिता व्यक्त केली जात आहे. माझी सर्वांना विनंती आहे की तुम्ही तुमच्या जिल्ह्यात तरुण आणि मुलांमध्ये संसर्गाची आकडेवारी एकत्र करा आणि त्याची समीक्षा करा.

लोकांचे जीव वाचवण्यासह त्यांचे जीवन नॉर्मल करण्यालाही प्राधान्य आहे. गरीबांसाठी मोफत धान्याची सुविधा असेल किंवा आवश्यक पुरवठा असेल. काळाबाजार रोखण्याचंही आव्हान आपल्यासमोर आहे. या सगळ्यात कोरोनाविरोधातील लढा जिंकायचा आहे आणि पुढे जाणंही गरजेचं असल्याचं मोदींनी म्हटलं.