Prakash Ambedkar : प्रकाश आंबेडकरांची काँग्रेससोबत स्वतंत्र चर्चा सुरु; मल्लिकार्जून खर्गेंना लिहिलं पत्र

Prakash Ambedkar on Congress : महाविकास आघाडीच्या जागावाटपाचा तिढा सुटता सुटत नाहीये. काँग्रेस, शरद पवार गट आणि उबाठा गट यांच्यामध्ये वाटाघाटीसंदर्भात सातत्याने बैठका सुरु आहेत, मात्र अद्यापही मार्ग निघालेला नाही. त्यातच वंचित बहुजन आघाडीला अपेक्षित जागा मिळत नसल्यामुळे भिजत घोंगडं पडलं आहे, असा आरोप होतोय.

वंचित बहुजन आघाडीचे प्रमुख प्रकाश आंबेडकर यांनी उद्धव ठाकरे गटावर गंभीर आरोप करत संजय राऊत माध्यमांशी खोटं बोलत असल्याचं म्हटलं आहे. त्यामुळे आपण काँग्रेसशी स्वतंत्र बोलणी सुरु केल्याचंही त्यांनी स्पष्ट केलं. मात्र काँग्रेसकडूनही प्रतिसाद मिळत नसल्याची खंत आंबेडकरांनी व्यक्त केली.

प्रकाश आंबेडकर यांनी मंगळवारी माध्यमांशी संवाद साधला. ते म्हणाले की, महाविकास आघाडीमध्ये दहा जागांवर वाद आहे, त्या जागा कोणीही सोडायला तयार नाहीये. शिवाय आणखी पाच जागांवरुन मतभेद आहेत. या जागांवर शेअरिंग होऊ शकत नाही, असं काँग्रेस, शरद पवार गट आणि उबाठा गटाचा दावा आहे. त्यामुळे चर्चा पुढे जात नाही.

आंबेडकर पुढे म्हणाले की, वंचितचं तिन्ही पक्षांशी बोलणं झालं. परंतु आधी त्यांनी त्यांच्यात बोलणी करावी मग आमच्याशी बोलणी करावी, अशी आमच्यी भूमिका आहे. संजय राऊत वंचितविषयी मीडियाशी खोटं बोलत आहेत. तिन्ही पक्षांची भांडणं मिटलेली नसताना ते एकत्र येतील का, हाच प्रश्न आहे. आधी तु्म्ही तुमचं मिटवा, अशी आमची भूमिका आहे.

''त्यामुळे आम्ही काँग्रेसची बोलणी सुरु केली. काँग्रेसचे राष्ट्रीय अध्यक्ष मल्लिकार्जुन खर्गे यांना राज्यातील परिस्थितीविषयी सविस्तर माहिती पत्राद्वारे दिली आहे. मात्र त्यांच्याकडून अजूनही प्रतिक्रिया देण्यात आलेली नाही. तिन्ही पक्षातील चर्चा लवकरात लवकर संपतील, अशी आमची अपेक्षा आहे.'' असं प्रकाश आंबेडकर शेवटी म्हणाले.