मायावतींनंतर JDS चे कुमारस्वामी देणार भाजपच्या द्रौपदी मुर्मू यांना पाठिंबा!

देशातील राष्ट्रपतीपदाच्या निवडणुकीसाठी विरोधी पक्षांनी कंबर कसली असून उमेदवाराच्या पाठिंब्यासाठी फोनाफोनी सुरुय. मात्र, अशातच कुमारस्वामी यांनी वेगळा निर्णय घेण्याची तयारी दर्शविल्यानं विरोधी पक्षांना मोठा धक्का बसलाय. पश्चिम बंगालच्या मुख्यमंत्री ममता बॅनर्जी (Mamata Banerjee) यांनी राष्ट्रपतीपदाच्या निवडणुकीबाबत (Presidential Election) संयुक्त भूमिका ठरवण्यासाठी विरोधी पक्षांची बैठक बोलावली होती. या बैठकीत कोणाला पाठिंबा द्यायचा याबाबत चर्चा झाली. या बैठकीला उपस्थित असलेल्या जनता दलनं (सेक्युलर) सत्ताधारी एनडीएच्या द्रौपदी मुर्मू (Draupadi Murmu) यांना पाठिंबा देण्याचे संकेत दिलेत.

मुर्मू यांना पाठिंबा दिल्यास त्याकडं ‘भाजपाला पाठिंबा’ म्हणून पाहिलं जाऊ नये हे अधोरेखित करताना, जेडी (एस) नेते आणि कर्नाटकचे (Karnataka) माजी मुख्यमंत्री कुमारस्वामी (H. D. Kumaraswamy) म्हणाले की, द्रौपदी मुर्मू यांना आधीच पुरेसा पाठिंबा आहे आणि त्यांना आमच्या समर्थनाची गरज नाही. परंतु, तरीही त्यांनी आमच्या समर्थनाची मागणी केलीय आणि हे त्यांच्या चांगुलपणाचं लक्षण आहे.

कुमारस्वामी पुढं म्हणाले, मुर्मू यांनी माजी पंतप्रधान आणि जेडीएस (JDS) सुप्रीमो एच.डी देवेगौडा (HD Deve Gowda) यांना पाठिंबा देण्याची विनंती करण्यासाठी दोनवेळा फोन केला होता. त्यांनी वैयक्तिकरित्या बंगळुरूला येण्याची इच्छा व्यक्त केली. परंतु, पाठिंबा मिळविण्यासाठी त्यांना इथं येण्याची आवश्यकता नाहीय. माझ्या मते मुर्मू यांनी आधीच ही निवडणूक जिंकलीय. जनता दल सेक्युलरचे संसदेत 2 खासदार आहेत. राज्यसभेत देवेगौडा आणि लोकसभेत त्यांचा नातू प्रज्वल रेवन्ना. तसेच कर्नाटक विधानसभेत त्यांचे 30 आमदार आहेत. हे आमदार राष्ट्रपतीपदाच्या निवडणुकीत मतदान करणार आहेत. मात्र, जेडीएसच्या या निर्णयावर काँग्रेसनं (Congress) टीका करण्यास सुरुवात केलीय.