गृहमंत्री अमित शहांचा प्रस्ताव शेतकऱ्यांनी फेटाळला; आपल्या मागण्यांवर ठाम

नवी दिल्ली : नव्या कृषी कायद्यांच्या विरोधात आंदोलन करणारे शेतकरी मागे हटायला तयार नाहीयेत. पंजाब-हरयाणाच्या शेतकऱ्यांनी सकाळी 11 वाजता झालेल्या बैठकीत बुराडी मैदानमध्ये जायला नकार दिला. त्यानंतर केंद्रीय गृह सचिव अजय भल्ला यांनी पंजाबच्या 32 शेतकरी संघटनांना प्राथमिक बातचीतीसाठी निमंत्रण दिलं. त्यांनी पुन्हा एकदा आंदोलनाचे ठिकाण बदलण्याची मागणी केली आहे. तर शेतकऱ्यांचं म्हणणं आहे की, आम्ही सरकारसोबत कोणत्याही अटीशर्थीविना चर्चा करु इच्छितो. आता संध्याकाळी चार वाजता गृह सचिवांच्या या प्रस्तावावर संयुक्त किसान मोर्चाची बैठक होणार आहे. 

हेही वाचा - यूपीमध्ये जबरदस्तीने धर्मांतराचा प्रयत्न; 'लव्ह जिहाद' कायद्याअंतर्गत पहिला गुन्हा

अडीच तासांच्या बैठकीत शहांचा प्रस्ताव अमान्य
याआधी आंदोलकांच्या बैठकीत अमित शहा यांचा प्रस्ताव शेतकऱ्यांनी अमान्य केला होता. शहा यांनी प्रस्ताव दिला होता की, सरकार शेतकऱ्यांशी चर्चा करायला तयार आहे फक्त, त्यांनी बॉर्डरवरुन हटून दिल्लीच्या बुराडीमधील निरंकारी समागम मैदानात आंदोलन करावं. सकाळी जवळपास अडीच तास चाललेल्या या बैठकीत ही अट अमान्य केली गेली. शेतकऱ्यांचं म्हणणं आहे की ते केंद्र सरकारशी कोणत्याही अटी-शर्थीविना चर्चा करु इच्छित आहेत. आता सायंकाळी चार वाजता परत एकदा संयुक्त किसान मोर्चाची बैठक  होणार असल्याची माहिती समोर येतीय. या बैठकीत शेतकरी अमित शहा यांच्या प्रस्तावावर काय निर्णय घेतील, हे पाहणं निर्णायक ठरणारे.

हेही वाचा - PUC सर्टिफिकेट नसेल तर आता RC जप्त; 1 जानेवारीपासून वाहतुकीचे नियम कडक​
घरातून अन्न-धान्यासह निघालेत शेतकरी
आंदोलनासाठी आलेल्या शेतकऱ्यांचा निर्धार अगदी पक्का असल्याचं दिसून येतंय. नव्या कृषी कायद्याविरोधात अगदी ठामपणे निकराचा लढा देण्याचं या शेतकऱ्यांनी ठरवल्याचं गेल्या काही दिवसांतील घडामोडींवरुन स्पष्ट झालं आहे. हे आंदोलनकर्ते घरातून रेशन-पाणी, अंथरुन-पांघरुन घेऊनच निघाले आहेत. ऐन थंडीतही त्यांचा निश्चय ढळलेला नाहीये. या आंदोलनात महिला आणि लहान मुलेही सामिल आहेत. या सगळ्यांचीच मागणी आहे की नवे कृषी कायदे जुलमी असून ते मागे घ्यावेत.