राहुल गांधींनी भाजप-आरएसएसची तुलना केली देशद्रोहींशी; म्हणाले...

नवी दिल्ली : देशाला द्वेषाच्या आगीत टाकून हात शेकणाऱ्या भाजप (BJP) आणि आरएसएसचा (RSS) इतिहास सर्वांना माहीत आहे, असे काँग्रेसचे माजी अध्यक्ष राहुल गांधी म्हणाले. राजस्थानातील उदयपूर आणि महाराष्ट्रातील अमरावती येथे नूपुर शर्माच्या समर्थनात पोस्ट केल्याने दोघांची हत्या करण्यात आली. यानंतर राहुल गांधी (Rahul Gandhi) यांनी नरेंद्र मोदी सरकारवर जोरदार हल्ला चढवला आहे.

शनिवारी (ता. २) काँग्रेस नेते राहुल गांधी (Rahul Gandhi) यांनी भाजप आणि आरएसएसवर जोरदार हल्ला चढवला. उदयपूर व अमरावती येथील दोघांच्या हत्येनंतर त्यांनी हे वक्तव्य केले. अमरावती येथील केमिस्ट दुकान मालक उमेश कोल्हे यांची हत्या उदयपूरच्या कन्हैयालालच्या हत्येच्या घटनेपूर्वी म्हणजे २१ जून रोजी घडली होती.

परंतु, अमरावतीची घटना उदयपूरच्या घटनेसारखीच असल्याचे आता तपासातून समोर आले आहे. येथेही हल्लेखोरांनी उमेश कोल्हे यांचा गळा चिरून खून केला होता. नूपुर शर्माच्या समर्थनार्थ कोल्हे यांनी वक्तव्य केल्याचे सांगण्यात येत आहे. घटनेचे गांभीर्य लक्षात घेऊन गृहमंत्री अमित शहा यांनी हे प्रकरण एनआयएकडे सोपवले आहे.

याप्रकरणी आता राहुल गांधींनी (Rahul Gandhi) भाजपवर (BJP) जोरदार हल्ला चढवला आहे. ‘खोटा प्रचार आणि खोटेपणा हा भाजप आणि आरएसएसचा (RSS) पाया आहे. द्वेषाच्या आगीत देशाला टाकणाऱ्या भाजप-आरएसएसचा इतिहास संपूर्ण भारताला माहीत आहे.

या देशद्रोहींनी (Traitor) कितीही तोडण्याचा प्रयत्न केला तरी, काँग्रेस त्यांच्यापेक्षा जास्त जोडण्याचा प्रयत्न करेल. भारताला एकसंध करण्यासाठी काम करीत राहू, असे ट्विट राहुल गांधी यांनी केले.