'राफेल'बाबत लढण्यासाठी राहुल गांधींनी दिला नवा मंत्र, म्हणाले, "मेरे कांग्रेस साथियों..."

नवी दिल्ली : राफेलप्रकरणी फ्रान्समधील मासिक मीडियापार्ट मधील एका लेखामध्ये खळबळजनक खुलासा करण्यात आला आहे. या खुलाशानंतर राफेल प्रश्नावरुन पुन्हा एकदा रणकंदन माजलं आहे. काँग्रेसने पुन्हा एकदा राफेलच्या व्यवहाराबाबत प्रश्नचिन्ह उपस्थित केलंय. काँग्रेस प्रवक्ते पवन खेडा यांनी आरोप केलाय की राफेच्या व्यवहारामध्ये मोठा घोटाळा झाला आहे. या व्यवहारामध्ये भष्ट्राचार झाला असून त्यातील कमीशन कुणाला मिळाली, याबाबतचा तपास करण्यात यावा, अशी मागणी काँग्रेसने केली आहे.

याबाबत आता ट्विट करत राहुल गांधी यांनी काँग्रेस कार्यकर्त्यांना न थकता लढण्याचा सल्ला दिला आहे. त्यांनी म्हटलंय की, जर पावलोपावली सत्याची साथ असेल तर काळजी कशाची? माझ्या काँग्रेसच्या साथींनो, भ्रष्ट केंद्र सरकारच्या विरोधात अशाच प्रकारे लढत रहा. थांबू नका, थकू नका आणि घाबरु नका! असंही त्यांनी म्हटलंय.

पवन खेडा यांनी म्हटलंय की, भाजपने इतक्या लवकर ही डील केली आहे की, टेंडरशिवायच 526 कोटींचा सौदा 1600 कोटींमध्ये निश्चित झाला. देशातील हा सर्वांत मोठा संरक्षण घोटाळा असल्याचंही त्यांनी म्हटलं. यावर आता भाजप प्रवक्ते संबित पात्रा यांनी काँग्रेसवरच पलटवार केला आहे. त्यांनी या रिपोर्टमधील एका मध्यस्थ्याच्या नावाचा उल्लेख करताना म्हटलं की, आश्चर्याची बाब ही आहे की ज्या मध्यस्थ्याचं नाव ऑगस्टा वेस्टलँड प्रकरणात समोर आलं होतं, त्याचंच नाव राफेल डीलमध्येही आलंय.

पात्रांनी म्हटलंय की, राफेलचा विषय हा मोठ्या घोट्याळ्याचा विषय असून हे संपूर्ण प्रकरण सन २००७ ते २०१२ दरम्यान घडलं आहे. या काळात लाचखोरीचा प्रयत्न झाला आहे. यामध्ये मध्यस्थाचं नावही समोर आलं आहे. सुषेण गुप्ता असं याचं नाव आहे. हा कोणी नवा खेळाडू नसून जुनाच खेळाडू आहे. याला ऑगस्टा वेस्टलँड केसमधील किंगपिन मानलं जात आहे. या प्रकरणात मध्यस्थ असलेली व्यक्ती सन २००७ ते २०१२ मध्ये राफेल डीलमधील लाचप्रकरणातील मध्यस्थ होता. जास्त योगायोग व्हायला लागले की ते सत्यही असू शकतं.