Railway: वीस डब्यांची पहिली ‘वंदे भारत’ सज्ज, मुंबई - अहमदाबाद प्रवास पाच तासांत पूर्ण!

Latest Maharashtra News : देशातील पहिली २० डब्याची वंदे भारत एक्स्प्रेस मुंबई ते अहमदाबाददरम्यान धावण्यासाठी सज्ज झाली आहे. या मार्गावर शुक्रवारी (ता.९) या गाडीची यशस्वी चाचणी घेण्यात आली. वंदे भारत रेल्वेने  १३० किलोमीटर ताशी वेगाने अहमदाबाद ते मुंबई सेंट्रलचे अंतर पाच तास २१ मिनिटांत पार केले.

मुंबई ते अहमदाबाद हा सर्वात व्यग्र रेल्वे मार्ग म्हणून ओळखला जातो. या मार्गावर ५० हून अधिक रेल्वे गाड्या धावतात. ज्यामध्ये वंदे भारत, तेजस आणि शताब्दी एक्स्प्रेससारख्या गाड्यांचा समावेश आहे.

तसेच या मार्गावरील रेल्वे गाड्यांचे आरक्षण १३८ ते १५६ टक्क्यांपर्यंत पोहचले आहे. सध्या १६ डब्यांच्या वंदे भारत एक्स्प्रेस मुंबई ते अहमदाबाददरम्यान धावत आहे. प्रवाशांची मागणी लक्षात घेऊन भारतीय रेल्वेने पश्चिम रेल्वे मार्गावर आणखी २० डब्यांची ‘वंदे भारत’ चालविण्याचा निर्णय घेतला होता.

त्यानुसार देशातील पहिली २० डब्यांची वंदे भारत गाडीची चाचणी घेण्यात आली. ही २० डब्याची गाडी शुक्रवारी (ता. ९) अहमदाबादहून सकाळी ७ वाजता रवाना झाली. ती दुपारी १२ वाजून २१ मिनिटांनी मुंबई सेंट्रलला पोहोचली. त्यानंतर दुपारी एक वाजता गाडीने मुंबई सेंट्रल ते अहमदाबादकडे परतीचा प्रवास सुरू केला. या गाडीची चाचणी ताशी १३०किलोमीटर वेगाने घेण्यात आली.

वंदे भारत रेल्वेची ताशी तब्बल १८० किलोमीटर वेगाने धावण्याची क्षमता आहे; मात्र वेगानुसार रुळांची क्षमता नसल्याने ‘वंदे भारत’ची गती ११० ते १३० किलोमीटर ताशी ठेवण्यात येते. त्यामुळे भारतीय रेल्वेने या गाड्यांचा वेग दुप्पट करणे आणि सरासरी वेगात २५ किमी प्रतितासाने वाढ करण्यासाठी ‘मिशन रफ्तार’ची आखणी केली आहे. यासाठी भारतीय रेल्वेने मुंबई ते दिल्ली १, ३७९.१४ किमीचा मार्ग निवडला आहे. मुंबई-सुरत-बडोदा - दिल्ली त्याचबरोबर मुंबई- बडोदा- अहमदाबाद या लोहमार्गाचे अद्ययावतीकरणाचे काम सुरू आहे.