संरक्षणमंत्री राजनाथसिंह यांनी आज आणीबाणीच्या मुद्यावरून काँग्रेसवर टीका केली. ‘‘काँग्रेसचे नेते आमच्यावर हुकुमशाहीची टीका करतात पण आणीबाणीच्या काळात (१९७५) मलाच अठरा महिने तुरुंगामध्ये ठेवण्यात आले होते. याच काळामध्ये माझ्या आईचे मेंदूच्या पक्षाघातामुळे निधन झाले होते पण मला अंत्यसंस्काराला देखील जाता आले नाही. मला तेव्हा तत्कालीन सरकारने पॅरोल देखील मिळू दिला नव्हता, आज हीच मंडळी आम्ही हुकूमशहा असल्याची टीका करत आहेत,’’ असे राजनाथसिंह यांनी ‘एएनआय’ला दिलेल्या मुलाखतीमध्ये सांगितले.
राजनाथसिंह म्हणाले, ‘‘तेव्हा माझ्या आईवर २७ दिवसांपासून रुग्णालयामध्ये उपचार सुरू होते पण अखेरच्या क्षणीही मला तिचे दर्शन घेता आले नाही.’’ राजनाथ यांनी यावेळी चिनी घुसखोरीवर देखील भाष्य केले. आमची इंचभर देखील जमीन कोणी घेऊ शकत नाही असे त्यांनी सांगितले.
पाकमधून होणाऱ्या दहशतवादी कारवायांबद्दल बोलताना ते म्हणाले, ‘‘पाकला जर त्यांच्या भूमीवरील दहशतवादाचा निःपात करता येत नसेल तर आम्ही त्यांना सहकार्य करायला तयार आहोत. दहशतवाद्यांचा आधार घेऊन जर पाकिस्तान भारताला अस्थिर करू पाहात असेल तर आम्ही त्यांना सडेतोड उत्तर देऊ. पाकिस्तानने आधी दहशतवाद्यांवर नियंत्रण ठेवायला हवे. ते आमचे शेजारी आहेत त्यांची नियत साफ असेल तर दहशतवाद थांबायला हवा.’’
मध्यंतरी एका दूरचित्रवाणी वाहिनीला दिलेल्या मुलाखतीमध्ये बोलताना राजनाथ यांनी ‘घुसकर मारेंगे’ असे विधान केले होते. याबाबत विचारले असता त्यांनी त्याला दुजोरा दिला. सीमेपलीकडून होणाऱ्या दहशतवादी कारवाया आम्ही खपवून घेणार नाहीत. हे हल्ले रोखण्यासाठी आम्ही योग्य त्या उपाययोजना करू, असे त्यांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
