Ram Mandir Inauguration : अयोध्येतील सोहळ्याच्या पार्श्वभूमीवर AAP चा मोठा निर्णय; दिल्लीमध्ये होणार 'हा' धार्मिक विधी

Ram Mandir Inauguration News : अयोध्येत २२ जानेवारी रोजी राम मंदिर उद्घाटन आणि रामलल्ला मूर्ती प्राणप्रतिष्ठा संपन्न होणार आहे. अयोध्येसह देशभर आनंदोत्सव साजरा होणार आहे. दुसरीकडे काँग्रेसच्या नेत्यांनी उद्घाटन सोहळ्याला न जाण्याचा निर्णय घेतला आहे.

आम आदमी पक्षाचं सरकार असलेल्या दिल्लीमध्ये 'आप'ने मोठा निर्णय घेतला असून शहरात मोठी शोभायात्रा निघणार आहे. यासह आम आदमी पक्षाने पूर्ण शहरामध्ये भंडाऱ्याचं आयोजन केलेलं आहे. शोभायात्रा आणि भंडाऱ्यामध्ये पक्षाचे सर्व नेते उपस्थित राहणार आहेत.

दिल्लीतल्या अरविंद केजरीवाल सरकारने राम मंदिर उद्घाटन सोहळ्याच्या पार्श्वभूमीवर २२ जानेवारी रोजी सर्व सरकारी कार्यालयांना अर्ध्या दिवसाची सुट्टी जाहीर केली आहे. यासंदर्भात अरविंद केजरीवाल यांनी दिल्लीचे एलजी विनय सक्सेना यांना एक प्रस्ताव पाठवला होता. शनिवारी एलजींनी या प्रस्तावाला मंजुरी दिली.

अरविंद केजरीवाल यांच्या सरकारने २० जानेवारीपासून तीन दिवसांपर्यंत भव्य रामलीलाचं आयोजन केलेलं आहे. रविवारी खुद्द केजरीवाल या सोहळ्यासाठी उपस्थित राहणार आहेत. दिल्लीतल्या आयटीओजवळील प्यारेलाल ऑडिटोरियम येथे रामलीला संपन्न होत आहे. रामलीला सगळ्यांसाठी निःशुल्क असणार आहे.