Karnataka : रा. स्व. संघाच्या बैठकीवरून वाद;केंद्रीय विद्यापीठात आयोजनास परवानगी दिल्याने काँग्रेसची टीका

बंगळूर : कर्नाटकातील गुलबर्ग्याजवळील कर्नाटक केंद्रीय विद्यापीठात १८ जुलै रोजी राष्ट्रीय स्वयंसेवक संघाची (रा.स्व. संघ) बैठक झाली होती. आता या बैठकीमुळे वादाला तोंड फुटले आहे. कर्नाटक केंद्रीय विद्यापीठाच्या अतिथिगृहात दुपारी चार ते सात दरम्यान ही बैठक झाली. यावेळी सुमारे १०० विद्यार्थी आणि प्राध्यापक उपस्थित होते. रा. स्व. संघाचा १०० वा वर्धापन दिन साजरा करण्याबाबतच्या नियोजनाविषयी या बैठकीत चर्चा करण्यात आली होती.

याबैठकीनंतर कर्नाटकचे मंत्री प्रियांक खर्गे यांनी विद्यापीठाच्या व्यवस्थापनावर टीका केली आहे. खर्गे यांनी ‘एक्स’वर या बैठकीचा व्हिडिओ पोस्ट केला आहे. ‘‘कर्नाटकातील विद्यार्थ्यांच्या शैक्षणिक आकांक्षा पूर्ण करण्यासाठी कर्नाटक केंद्रीय विद्यापीठाची स्थापना मल्लिकार्जुन खर्गे यांनी केली होती. मात्र सध्या येथे दर्जेदार शिक्षण देण्याऐवजी ते ‘सीयूके’मध्ये बदलले आहे. याला आळा घालण्याची गरज आहे,’’ असे मत प्रियांक यांनी व्यक्त केले आहे. गेल्या दशकभरात, सरकारी संस्थांमध्ये प्रचारकांची घुसखोरी मोठ्या प्रमाणावर झाली आहे, ज्यामुळे व्यवस्थेचा संपूर्ण ऱ्हास झाला आहे, अशी टीकाही त्यांनी केली आहे.

रा. स्व. संघावर बंदी नाही

प्रियांक खर्गे यांच्याकडून टीका करण्यात आल्यानंतर विद्यापीठाचे कुलगुरू बट्टू सत्यनारायण यांनी त्यांची बाजू मांडली आहे. ‘‘रा. स्व. संघ ही बंदी घालण्यात आलेली संघटना नाही,’’ असे सांगून सभेला परवानगी देण्याच्या निर्णयाचे त्यांनी समर्थन केले आहे. त्याचप्रमाणे विद्यापीठ काही गटांना कार्यक्रम आयोजित करण्यास परवानगी देऊन, इतरांना मात्र परवानगीस नकार देऊ शकत नाही, असा युक्तिवादही त्यांनी केला आहे.

दरम्यान, ऑल इंडिया स्टुडंट्स फेडरेशननेही(एआयएसएफ) विद्यापीठात रा. स्व संघाच्या बैठकीस परवानगी दिल्याबद्दल विद्यापीठ प्रशासनावर जोरदार टीका केली आहे. अशा पद्धतीने बैठकांना परवानगी देऊन शैक्षणिक जागेचे भगवेकरण करण्याचा प्रयत्न सुरू असल्याचा दावा एआयएसएफ ने केला आहे. तसेच एआयएसएफने, रा. स्व. संघाला बैठक घेण्यास परवानगी दिल्याबद्दल विद्यापीठ प्रशासनाचा निषेधही केला आहे. कुलगुरू सत्यनारायण यांच्यावर कारवाई करावी अशी मागणी या संघटनेच्या वतीने करण्यात आली आहे.