'या जन्मातच काय, तर पुढच्या सात जन्मातही नितीश कुमार पंतप्रधान होऊ शकणार नाहीत'

माजी केंद्रीय मंत्री आरसीपी सिंह (RCP Singh) यांनी जनता दलाचा राजीनामा देताना मुख्यमंत्री नितीश कुमार (Nitish Kumar) यांच्यावर जोरदार हल्लाबोल केला. माध्यमांशी बोलताना आरसीपी यांनी सांगितलं की, नितीश कुमार सात जन्मातही पंतप्रधान होऊ शकणार नाहीत. जेडीयू (JDU) हे बुडणारं जहाज आहे. आता या पक्षात काहीच उरलं नाहीय, असा टोला त्यांनी लगावलाय.

जेडीयूनं आरसीपी सिंग यांच्यावर प्रचंड संपत्ती गोळा केल्याचा आरोप करत त्यांना कारणे दाखवा नोटीस बजावल्यानंतर, शनिवारी संध्याकाळी आरसीपी यांनी पक्षाच्या प्राथमिक सदस्यत्वाचा राजीनामा दिला. यावेळी माध्यमांशी संवाद साधताना आरसीपी सिंह यांनी जेडीयू आणि बिहारचे मुख्यमंत्री नितीश कुमार यांच्यावर जोरदार टीका केलीय.

एका पत्रकारानं त्यांना नितीश कुमार पंतप्रधान होण्याबाबत प्रश्न विचारला असता, ते चांगलेच संतापले. आरसीपी म्हणाले, नितीश कुमार या जन्मातच काय, तर पुढच्या सात जन्मातही ते पंतप्रधान होऊ शकणार नाहीत. जेडीयूनं राजकारणाची पातळी कमी केलीय. हे एक बुडणारं जहाज आहे. आता जेडीयूमध्ये काय उरलंय?, असा सवालही त्यांनी उपस्थित केलाय.

जेडीयूचे राष्ट्रीय अध्यक्ष असलेले आरसीपी सिंह आणि पक्ष हायकमांड यांच्यात बराच काळ वाद सुरू होता. नुकत्याच झालेल्या राज्यसभा निवडणुकीत त्यांचं तिकीट कापण्यात आलं होतं. यानंतर त्यांना मंत्रिपदाचा राजीनामा द्यावा लागला. या शिवाय, त्यांचा पाटण्यातील सरकारी बंगलाही नितीश सरकारनं हिसकावून घेतला होता. यानंतर आरसीपींच्या जवळच्या काही नेत्यांना पक्षातून निलंबित करण्यात आलं होतं. दरम्यान, काही दिवसांपूर्वी आरसीपी सिंह भाजपमध्ये प्रवेश करणार असल्याची चर्चा होती. मात्र, भाजप आणि आरसीपींनी ती चर्चा फेटाळून लावलीय.