राजकीय वादाचे प्रतिबिंब परीक्षांमध्ये

कोलकता - भाजप (BJP) आणि तृणमूल काँग्रेस (Trinamool Congress) यांच्यातील राजकीय वाद (Political Dispute) केंद्रीय आणि राज्य आयोगांच्या परीक्षांमध्ये विचारलेल्या प्रश्‍नांमधूनही प्रतिबिंबीत (Reflection) होत असल्याचे दिसून येत आहे. केंद्रीय लोकसेवा आयोगाच्या परीक्षेत पश्‍चिम बंगालमधील परिस्थितीबाबत विचारलेल्या एका प्रश्‍नाला प्रत्युत्तर म्हणून पश्‍चिम बंगाल लोकसेवा आयोगाच्या (डब्लूबीसीएस) (WBBS) परिक्षेतील एका प्रश्‍नाद्वारे भाजपला डिवचण्यात आले आहे.

‘डब्लूबीसीएस’च्या परीक्षेमध्ये, ‘तुरुंगात असताना ब्रिटिश प्रशासनाकडे दयेचा अर्ज करणारा स्वातंत्र्यसैनिक कोण?’ असा प्रश्‍न विचारण्यात आला होता. या प्रश्‍नाचा रोख स्वातंत्र्यवीर वि. दा. सावरकरांकडे असल्याचे जाणवते. स्वातंत्र्यवीर सावरकरांना भाजप आणि राष्ट्रीय स्वयंसेवक संघ आदर्शस्थानी मानतो. अत्यंत जहाल आणि देशासाठी त्याग करताना मागेपुढे न पाहणारे क्रांतिकारक, अशी सावरकारांची प्रतिमा अधिक प्रकर्षाने सर्वांसमोर आणण्याचे भाजपचे प्रयत्न आहेत.

‘यूपीएससी’च्या परीक्षेत, पश्‍चिम बंगालमधील विधानसभा निवडणुकीनंतर झालेल्या हिंसाचाराबाबत मतप्रदर्शन करण्यास परीक्षार्थींना सांगण्यात आले होते. हे पश्‍चिम बंगाल सरकारला झोंबले असावे. कारण, ‘डब्लूबीसीएस’च्या परीक्षेत राष्ट्रीय नागरीक नोंदपुस्तिकेची (एनआरसी) सध्याची स्थिती आणि टूलकिट याबाबत प्रश्‍न विचारण्यात आला होता. या दोन मुद्द्यांवरून भाजप सरकारवर प्रचंड टीका झाली होती. बंगालमधील हिंसाचाराची सध्या केंद्रीय अन्वेषण विभागाकडून चौकशी सुरु आहे. न्यायालयाच्या आदेशावरून विशेष तपास पथकाचीही स्थापना झाली आहे. ‘यूपीएससी ही निष्पक्ष संस्था होती.

मात्र, आता भाजपकडून त्यांना प्रश्‍न पुरविले जातात. शेतकरी आंदोलनावर विचारलेले प्रश्‍नही राजकीय हेतूंनी प्रेरित असल्यासारखे वाटतात. भाजपमुळे यूपीएससी सारख्या संस्थांचे महत्त्व कमी होत आहे,’ अशी प्रतिक्रिया तृणमूल काँग्रेसच्या प्रमुख ममता बॅनर्जी यांनी दिली आहे. ‘सर्व राज्यांमध्ये एकाच वेळी विधानसभा निवडणूक घ्यावी का?’ आणि ‘शेतकरी आंदोलन राजकीय हेतूंनी प्रेरित असल्यासारखे वाटते का?’ असेही प्रश्‍न ‘यूपीएससी’च्या परीक्षेत विचारण्यात आले होते.