युक्रेन शेजारील देशांना परराष्ट्र मंत्र्यांचा फोन; भारतीय विद्यार्थ्यांना मदतीची केली विनंती

नवी दिल्ली : युक्रेनमध्ये युद्धाला (Ukraine War) सुरुवात झाल्यानंतर तिथं अडकून पडलेल्या भारतीय विद्यार्थ्यांचा प्रश्न सध्या ऐरणीवर आला आहे. या विद्यार्थ्यांना आपल्या देशांमध्ये प्रवेश द्यावा यासाठी त्यांना सहकार्य करण्याचं आवाहन परराष्ट्र मंत्री एस. जयशंकर (S Jaishankar) यांनी त्यांच्या परराष्ट्र मंत्र्यांना थेट फोन करुन केली आहे. युक्रेनच्या सीमेवर सध्या भारतीय विद्यार्थ्यांना मोठ्या समस्येला सामोर जावं लागत आहे. याचे अनेक धक्कादायक व्हिडिओ समोर आले आहेत. (S Jayshankar Discussions with Ukraine Neighboring Countries requested for help to Indian students)

भारताचे परराष्ट्रमंत्री जयशंकर यांनी मोलदोवाचे परराष्ट्र मंत्री निकू पेपोस्कू यांना फोन केला असून युक्रेन-मोलदोवा सीमेवर भारतीय विद्यार्थ्यांना सुलभ प्रवेशासाठी मदत करण्याची विनंती केली. तसेच या विनंती तात्काळ प्रतिसाद दिल्याबद्दल आणि मजबूत पाठिंबा दिल्याबद्दल त्यांचे आभार मानले. भारतीय परराष्ट्र मंत्रालयाचे प्रतिनिधी उद्या तिथे पोहोचतील, असंही जयशंकर यांनी त्यांना फोनवरुन सांगितलं.

दरम्यान, जयशंकर यांनी हंगेरीचे परराष्ट्र मंत्री पीटर त्सिझार्तो यांनाही फोन करुन हंगेरी-युक्रेन सीमेवरून भारतीय विद्यार्थ्यांना बाहेर काढण्यासाठी पाठिंबा दिल्याबद्दल आभार व्यक्त केले आहेत.