Sachin Pilot : सचिन पायलटांनी काँग्रेस हायकमांडला पकडलं कोंडीत; पक्षाकडं उरला 'हा' शेवटचा पर्याय

राजस्थानचे माजी उपमुख्यमंत्री सचिन पायलट (Sachin Pilot) यांच्या 5 तासांच्या उपोषणानं काँग्रेस हायकमांडची (Congress High Command) चांगलीच कोंडी झालीये. हायकमांड पायलटांबाबत कोणताही निर्णय घेऊ शकत नाहीये.

सुरुवातीला काँग्रेसचे प्रभारी रंधवा यांच्या वृत्तीनं पायलटांवर कारवाई होईल, असं वाटत होतं. मात्र, सध्या हे प्रकरण थंड झाल्याचं दिसतंय. कमलनाथ यांच्या एन्ट्रीनंतर सचिन पायलट यांची वृत्ती मवाळ झाल्याचं सांगण्यात येत आहे. राहुल गांधींच्या (Rahul Gandhi) हस्तक्षेपामुळं पायलट यांना दिलासा मिळू शकतो. पायलट यांच्यावर कोणतीही कारवाई करू नये हा पक्षासमोरचा शेवटचा उपाय आहे.

2020 च्या बंडानंतर यावेळीही सचिन पायलट यांना काँग्रेस हायकमांडकडून अभय मिळणार असल्याचं दिसतंय. माजी मुख्यमंत्री वसुंधरा राजे यांच्या कार्यकाळात झालेल्या भ्रष्टाचाराच्या प्रकरणांवर कारवाई न केल्याबद्दल सचिन पायलट यांनी काँग्रेस पक्षावर सडकून टीका केलीये. पायलट म्हणाले, 'सीएम गेहलोत (CM Gehlot) यांना दोनदा पत्र लिहिलं, पण उत्तर मिळालं नाही.'

सचिन पायलट सध्या दिल्लीत आहेत. गुरुवारी रात्री कमलनाथ यांच्या निवासस्थानी महत्त्वाची बैठक झाल्याची चर्चा आहे. या बैठकीत सचिन पायलट यांनी हे उपोषण पक्षाच्या किंवा सरकारच्या विरोधात नसल्याचं सांगितलं आहे. वसुंधरा राजे सरकारच्या भ्रष्टाचाराच्या मुद्द्यावर निवडणूक लढवली गेली आणि काँग्रेसचं सरकारही स्थापन झालं, मात्र चार वर्षांत चौकशी झाली नाही, याची आठवण करून देण्यासाठी हा संदेश होता. भ्रष्टाचाराबाबत मुख्यमंत्री अशोक गेहलोत यांना दीड वर्ष पत्रं लिहिली, पण उत्तर मिळालं नाही, असं त्यांनी सांगितल्याचं कळतंय.

सध्या सचिन पायलट 17 एप्रिलला दोन मोठ्या कार्यक्रमात सहभागी होणार आहेत. जयपूरच्या शाहपुरा येथील परमानंद धामच्या कार्यक्रमाला पायलट पोहोचतील आणि त्यानंतर झुंझुनू येथील खाटडी इथं शहीद शेओराम यांच्या पुतळ्याचं अनावरण केलं जाणार आहे. राजस्थान काँग्रेसमध्ये सुरू असलेल्या या राजकीय गोंधळाच्या पार्श्वभूमीवर सचिन पायलट सध्या दिल्लीत तैनात आहेत. त्यांनी रात्री उशिरा कमलनाथ आणि केसी वेणुगोपाल यांची भेट घेतली आणि दोघांसमोर आपली बाजू मांडली.