"जरा तरी लाजा बाळगा"; संबित पात्राच्या पोस्टवर नेटकऱ्यांच्या प्रतिक्रिया

देशातील पाच राज्यांतील निवडणुकांची रणधुमाळी चलू आहे. गोवा, उत्तरप्रदेश, उत्तराखंड, पंजाब आणि मणिपूर राज्यांतील विधानसभा निवडणुकांसाठी हे मतदान होणार असून गोवा राज्यातील मतदान झालेले आहे. त्याचबरोबर उत्तरप्रदेशमधील मतदान हे सात टप्यात होणार असून पाच टप्प्यातील मतदान झालेले आहे. तसेच मणिपूरमधील मतदान दोन टप्प्यात होणार असून २८ फेब्रुवारीला पहिल्या टप्प्यातील मतदान झाले असून दुसऱ्या टप्प्यातील मतदान पाच मार्चला होणार आहे. त्यामुळे सर्वच पक्षांनी प्रचारासाठी कंबर कसली आहे.

सध्या मणिपूरमध्ये भाजपाचा प्रचार करण्यासाठी केंद्रीय गृहमंत्री अमित शहा गेलेले आहेत. त्यांच्यासोबत भाजपाचे प्रवक्ते संबित पात्रासुद्धा प्रचाराच्या ताफ्यात आहेत. काल (ता. १) त्यांनी भाजपाच्या एका उमेदवाराच्या घरी जेवन केलं होतं. त्यावेळी भाजपाचे उमेदवार, अमित शहा, आसामचे मुख्यमंत्री हिमंत बिस्व सरमा, मणिपूरचे मुख्यमंत्री एन. बिरेन सिंग, थौबल येथील भाजपाचे उमेदवार शाम सिंग, अशोक सिंघल आणि बिस्वजित थोंगम हे उपस्थित होते.

प्रचारादरम्यानच्या या भोजनाचे फोटो संबित पात्रा यांनी आपल्या ट्वीटरवर शेअर केले होते. त्यानंतर त्यावर नेटकऱ्यांनी टीकेची झोड उठवली आहे. सध्या देशात काय परिस्थिती चालू आहे आणि तुम्ही तिकडे पार्टी करताय. अशा संतप्त प्रक्रिया लोकांकडून उमटत आहेत. संबित पात्रा यांच्या ट्वीट ला रिप्लाय करताना श्याम सिंग या व्यक्तीने म्हटलंय की, "युक्रेनमध्ये नवीन नावाच्या भारतीय विद्यार्थ्याचा बॉम्बहल्ल्यात मृत्यू झाला आहे. आपले लोकं मारले जात आहेत. तिकडे तहानभूकेने आपले विद्यार्थी मरत आहेत आणि तुम्ही तिकडे पार्ट्या करता. जरा लाजा बाळगा." अशी संतप्त प्रतिक्रिया यांनी व्यक्त केली आहे.

त्याचबरोबर "रशियाचे युक्रेनवरील हल्ले दिवसेंदिवस वाढतच चालले आहेत या काळात तरी जरा तुम्हाला लाज वाटली पाहिजे. देशातील विद्यार्थांना आणि नागरिकांना बाहेर काढण्याऐवजी तुम्ही फोटो पोस्ट करत आहात. यासारखे फोटो पोस्ट करुन तुम्ही काय साध्य करणार आहात?" अशा प्रतिक्रिया नेटकऱ्यांमध्ये उमटत आहेत.