देवी सरस्वती भेदभाव करत नाही; हिजाब प्रकरणावर राहुल गांधींची प्रतिक्रीया

कर्नाटकात हिजाबवरून (Karnataka Hijab) सुरू असलेल्या घटना अद्यापही थांबलेल्या दिसत नाही. हिजाब घालून आलेल्या विद्यार्थिनींना कुंदापूर येथील भांडारकर महाविद्यालयाच्या प्रवेशद्वारावर रोखण्यात आलं होतं. या घटनेनंतर वेगवेगळ्या प्रतिक्रीया उमटताना दिसत आहेत. त्यानंतर आता काँग्रेस नेते राहुल गांधींनी देखील या घटनेचा निशेध केला आहे.

हिजाबमुळे विद्यार्थीनींच्या शिक्षणात अडथळा आणून आपण भारतातील मुलींचं भविष्य धोक्यात आणता आहात. देवी सरस्वती सर्वांना ज्ञान देते. ती कुणाशीही भेदभाव करत नाही असं राहुल गांधी म्हणाले आहेत. कॉलेजच्या मार्गदर्शक सूचनांनुसार, विद्यार्थ्यांना गणवेशातच वर्गात यावं लागेल. बुरखा किंवा हिजाब घालून तुम्हाला महाविद्यालयात येता येणार नाही, असं महाविद्यालयाच्या प्राचार्यांनी विद्यार्थिनींना म्हटलं. पण, आम्ही गेल्या अनेक वर्षांपासून हिजाब घालून महाविद्यालयात येत आहोत. त्यामुळे आम्हाला परवानगी दिली पाहिजे, असं विद्यार्थिनींनी म्हटलं. तरीही त्यांना प्रवेश नाकारण्यात आला.

भंडारकर महाविद्यालयाच्या प्रशासनाने बुधवारी भगवा दुपट्टा घेऊन येणाऱ्या विद्यार्थ्यांनाही परवानगी नाकारली होती. त्यानंतर विद्यार्थ्यांनी ‘जय श्री राम’च्या घोषणा दिल्याने कॅम्पसमध्ये तणावपूर्ण परिस्थिती निर्माण झाली.