Seema Haidar : "सीमा हैदर परत आली नाही तर भारताचा नाश... 26/11 प्रमाणे..."; मुंबई पोलिसांना धमकी

मुंबई : मुंबई पोलिसांच्या ट्राफिक कंट्रोलला आणखी एक धमकी वजा मेसेज आला आहे. त्यामुळे पुन्हा खळबळ उडाली असून मुंबई पोलिस हे सायबर पोलिसांच्या मदतीने या प्रकणाचा तपास करत आहे. अज्ञात व्यक्तीने नशेतून किंवा खोडसाळ पणे हे कृत्य केल्याचा पोलिसांना संशय आहे.

मेसेज करणाऱ्या व्यक्तीने, "सीमा हैदर ही परत आली नाही तर भारताचा नाश... 26/11 प्रमाणे परत येण्यासाठी स्वत:ला तयार करा. या करिता उत्तरप्रदेश सरकार जबाबदार राहील" अशा प्रकारचा मेसेज केला आहे. या मेसेजनंतर पोलिसांनी तपास सुरू केला आहे.

दरम्यान, सीमा हैदर ही महिला आपल्या मुलांना घेऊन नेपाळमार्गे अवैधरित्या भारतात आली आहे. ती उत्तरप्रदेशमधील नोएडा येथील सचिन नावाच्या तरूणाच्या प्रेमात पडली होती. ती आपल्या नवऱ्याला सोडून भारतात आल्यानंतर पाकिस्तानकडून तिच्या या निर्णयाचा विरोध होत असून अनेक भारतीय नागरिकांकडून तिच्या कृतीला समर्थन देण्यात येत आहे.

सीमा हैदर या महिलेला परत पाठवण्यात यावे अशी मागणी पाकिस्तानातील तिच्या नवऱ्याकडून करण्यात येत आहे. तर अवैधरित्या रस्ता मार्गाने तिने भारतात प्रवेश केल्यामुळे सुरक्षा यंत्रणेवर प्रश्नचिन्ह उपस्थित केले जात आहेत.

याआधीसुद्धा मुंबई पोलिसांच्या कंट्रोल रूमला अनेकदा धमकीचे फोन आल्याची घटना घडली आहे. "26/11 सारखा हल्ला पुन्हा करू, मुंबईत 1993 सारखा बॉम्बस्फोट करू, सीएसएमटी स्थानकावर बॉम्ब आहे" अशी धमकीसुद्धा मुंबई पोलीस कंट्रोल रूमला अनेकदा मिळाली आहे.

पण या धमक्या मनोरूग्ण किंवा एखाद्या नशेतील व्यक्तीकडून देण्यात आल्या होत्या. तर पुणे पोलिसांनासुद्धा रेल्वे स्टेशनवर बॉम्ब असल्याचा फोन अनेकदा मनोरूग्णाने केल्याच्या घटना घडल्या आहेत.