Sharad Pawar Beed: पवारांची बीडची सभा ठरवणार पुढची दिशा, सगळे संभ्रम होणार दूर; अजित पवार घेणार मोठा निर्णय

Sharad Pawar Vs Ajit Pawar : राष्ट्रवादी काँग्रेस पक्षाचे संस्थापक तथा ज्येष्ठ नेते खा. शरद पवार यांची आज बीडमध्ये सभा होणार आहे. अजित पवार यांचे खंदे समर्थक मानले जाणारे मंत्री धनंजय मुंडे यांच्या बीड जिल्ह्यात शरद पवारांची सभा होणार आहे. यामुळे शरद पवार हे यावेळी नक्की काय बोलणार? याकडे संपूर्ण महाराष्ट्राचे लक्ष लागले आहे.

शरद पवारांची ही सभा झाल्यानंतर आज अजित पवार गटाची महत्त्वपूर्ण बैठक सायंकाळी पाच वाजता देवगिरी बंगल्यावर घेण्यात येणार असल्याची माहिती समोर येत आहे.

शरद पवार बीडच्या सभेत आज नक्की काय बोलणार? याकडे सर्वांचेच लक्ष असल्यामुळे शरद पवारांच्या बीडच्या सभेनंतर अजित पवार गटाच्या पुढच्या भूमिकेबाबत या बैठकीत चर्चा होणार असल्याची माहिती विश्वसनीय सूत्रांनी समोर आणली आहे.

गेल्या काही दिवसांपासून शरद पवार आणि नरेंद्र मोदी या दोघांची जवळीक संपूर्ण महाराष्ट्राला संभ्रमात टाकणारी आहे. यातच नुकतीच अजित पवार यांनी देखील शरद पवार यांची गुप्त भेट घेतली होती.

यामुळे हा संभ्रम अजूनच वाढला आहे. मात्र शरद पवारांच्या आजच्या बीडच्या सभेनंतर कार्यकर्त्यांसह नेत्यांमध्ये असलेला संभ्रम दूर होण्याची शक्यता आहे. यामुळेच की काय अजित पवार गटातील नेत्यांचेही शरद पवारांच्या आजच्या सभेकडे प्रामुख्याने लक्ष असणार आहे.

शरद पवार यांची सभा होताच आणि त्यांची भूमिका स्पष्ट होताच लगेच सायंकाळी पाच वाजता अजित पवार यांनी आपल्या नेत्यांची बैठक बोलावली आहे. यामुळे अजित पवार गट देखील आपली आगामी काळातील रणनीती या बैठकीमध्ये ठरवणार असल्याची माहिती समोर येत आहे.