काश्मीर भारतात राहण्यात फारुख अब्दुल्ला यांच्या वडिलांचं योगदान मोठं : शरद पवार

मुंबई - पुणे विद्यापीठाला सावित्रीबाई फुले पुणे विद्यापीठ हे नाव देण्यासाठी छगन भुजबळ यांचं योगदान असल्याचं प्रतिपादन राष्ट्रवादी काँग्रेसचे प्रमुख शरद पवार यांनी केलं. छगन भुजबळ यांच्या पंचाहत्तीरीनिमित्त आयोजित कार्यक्रमात ते बोलत होते. (Sharad Pawar news in Marathi)

छगन भुजबळ गौरव समितीच्या वतीने शरद पवार यांच्या अध्यक्षतेखाली मुंबईतील षण्मुखानंद सभागृहात ‘अमृत महोत्सव’ सोहळा पार पडला. यावेळी शरद पवार यांनी भुजबळ यांच्या कार्याचा गौरव केला.

दिल्लीत सगळ्या राज्य सरकारांची निवासस्थाने आहेत. त्यात महाराष्ट्राचं निवासस्थान सर्वात उत्तम आहे. लोक विचारतात हे कोणी बांधलं. ही वास्तू भुजबळ यांनी उभारली. पुण्यातील विद्यापीठाला सावित्रीबाई फुले पुणे विद्यापीठ नाव देण्यासाठी भुजबळ यांचं योगदान मोठं आहे. हे कोणाला माहित नाही, असंही पवार म्हणाले.

यावेळी पवार म्हणाले की, या देशात काश्मीर राहिलं, त्यात फारुख अब्दुल्ला यांच्या वडिलांचं योगदान मोठ आहे. अब्दुल्ला कुटुंबाची संपूर्ण निष्ठा कायम भारताच्या ऐक्याशी आहे, असंही पवार यांनी म्हटलं. या कार्यक्रमाला जम्मू काश्मीरचे मुख्यमंत्री फारुख अब्दुल्ला देखील उपस्थित होते.