आयुष्यभराची साथ सुटली! एकाच दिवशी लग्न अन् एकाच वेळी दोन भावांचा मृत्यू

Sirohi Brothers Love Story : राजस्थानच्या (Rajasthan) सिरोहीमध्ये (Sirohi) दोन भाऊ मरेपर्यंत एकत्र राहत होते. या दोन भावांची अनोखी प्रेमकहाणी परिसरात चर्चेचा विषय बनलीय. भावांमधील प्रेम, आपुलकी आणि मरेपर्यंत एकत्र राहण्याची भावना, याबद्दल लोक या भावंडांची उदाहरण देताहेत. चला तर मग जाणून घेऊया, या दोन भावांची कहाणी..

खरं तर, आम्ही सिरोहीच्या रेवदर उपविभागातील डांगराली गावातील रावताराम आणि हिराराम देवासी (Rawatram and Hiraram Brother) या दोन वृद्ध भावांबद्दल सांगत आहोत. जन्मत: दोन्ही भावांमध्ये अनेक वर्षांचं अंतर असतानाही या भावांची साथ आयुष्यभर टिकली. योगायोग असा की, दोघांचंही लग्न एकाच दिवशी झालं आणि दोघांनीही एकाच दिवशी आयुष्याचा निरोप घेतला.

शेवटच्या श्वासापर्यंत भावाची साथ

अवघ्या 15 ते 20 मिनिटांच्या कालावधीत रावताराम आणि हिराराम यांनी अखेरचा श्वास घेतला. जन्मापासूनच या दोन्ही भावांमध्ये आयुष्यभर इतकं प्रेम होतं की, त्याचा दाखला परिसरात दिला जातो. डांगराली गावातील रावताराम व हिराराम यांच्या घरात सध्या शोकाकुल वातावरण आहे. रावताराम यांचा मोठा मुलगा भिकाजी यांच्यावर आता कुटुंबाची जबाबदारी आहे. वडील रावताराम आणि काका हिराराम यांच्या परस्पर प्रेमाच्या इच्छेला सांभाळण्याची जबाबदारी भिकाजींच्या मनात घर करुन आहे. दोन्ही कुटुंबात एकूण 11 भावंडे आहेत.

भिकाराम यांनी सांगितलं की, वडील आणि काका यांचं प्रेम व बंधुभावाची कहाणी या परिसरात प्रसिद्ध आहे. दोघंही एकत्र कुटुंब सोडून जातील, यावर त्यांना अजूनही विश्वास बसत नाहीये. काका हिराराम काही दिवसांपासून आजारी होते; पण वडील रावताराम अगदी तंदुरुस्त होते. 28 जानेवारी रोजी सकाळपासून वडिलांनी काहीही खाल्लं नव्हतं. जेव्हा आईला हे समजलं, तेव्हा तिनं वडिलांना काहीतरी खाण्याची विनंती केली. आईच्या सांगण्यावरून वडिलांनी बिस्किटं खाल्ली आणि मग काकांची अवस्था विचारून ते झोपी गेले, त्यानंतर ते उठलेच नाहीत. 29 जानेवारी रोजी सकाळी 8 ते 9 च्या दरम्यान त्यांनी जगाचा निरोप घेतला. तर, दुसरीकडं काका हिराराम यांना थंडी वाजून आल्यानं त्यांनीही 15 मिनिटांत आपला जीव सोडला.