No Confidance Motion : राहुल संसदेत बोलत असताना 'आई' पाठीशी! भाषणावेळी सोनिया गांधी सतत करत होत्या मार्गदर्शन

Rahul And Sonia Gandhi : केंद्रातील नरेंद्र मोदी सरकारच्या विरोधात विरोधकांनी दुसरा अविश्वास ठराव आणला. यावेळी काँग्रेस नेते खासदार राहुल गांधी यांनी चर्चेत सहभाग नोंदवला. यावेळी त्यांनी मोदी सरकारवर हल्लाबोल केला.

मोदी सरकारवर हल्लाबोल करताना राहुल गांधी यांच्या पुढच्या रांगेत बसलेल्या त्यांच्या आई सोनिया गांधी या राहुल गांधी यांना सांकेतिक काहीतरी सूचना करत असल्याचे पाहायला मिळाले.

लोकसभेत भाषण करत असताना सोनिया गांधी या राहुल गांधी यांना अध्यक्ष्यांकडे बघून भाषण करा असे सांगताना दिसल्या. राहुल गांधी यांच्या संपूर्ण भाषणावेळी सोनिया गांधी आपले पुत्र राहुल गांधी यांना मार्गदर्शन करताना दिसून आल्या. त्यांचे भाषण हे अचूक असले पाहिजे याची खात्री त्या करून घेत होत्या.

राहुल गांधी हे देखील आपल्या आईचे ऐकत असल्याचे पाहायला मिळाले. सोनिया गांधी या राहुल गांधींना ज्या-ज्या सूचना करत होत्या त्या सूचनांचे पालन राहुल गांधी करत होते. राहुल गांधींच्या भाषणा वेळी विरोधकांनी गदारोळ सुरू केला. तेव्हा 'इंडिया' आघाडीतील घटक पक्षाचे खासदारही चांगलेच आक्रमक झाल्याचे पाहायला मिळाले. सोनिया गांधी यांच्या शेजारी बसलेले काँग्रेस नेते अधीर रंजन चौधरी यांना आपली आक्रमकता वाढवण्याचे आवाहन सोनिया गांधी यांनी केले.

सोनिया गांधींनी राहुल गांधींना हातातला फोटो दाखवायला सांगितला. नंतर तोच फोटो सोबत ठेवायला सांगितला. त्यानंतर राहुल यांनी पीएम मोदी आणि गौतम अदानी यांचा विमानात एकत्र बसलेला जुना फोटो दाखवला आणि सांगितले की, पंतप्रधान नरेंद्र मोदी हे अमित शाह आणि गौतम अदानी या दोनच लोकांचे ऐकतात, जसे रावण मेघनाद आणि कुंभकर्णाचे ऐकायचा.

आपल्या भाषणात, मणिपूर हिंसाचाराचा संदर्भ देताना, राहुल यांनी त्यांची आई सोनिया गांधी यांचाही उल्लेख केला आणि ते म्हणाले, "माझी एक आई इथे सभागृहात बसली आहे. दुसरी आई,भारत माता, मणिपूरमध्ये तुम्ही (मोदी सरकारने) मारली. " ते म्हणाले की, केंद्र सरकारने ईशान्येकडील राज्याचे दोन भाग केले आहेत. भाजपचे लोक देशभक्त नाहीत, ते देशद्रोही आहेत, त्यांनी मणिपूरमध्ये भारताची हत्या केली आहे असा आरोप राहुल यांनी केला.