Mangalore Crime : समाजकंटकांकडून प्रार्थनास्थळावर तुफान दगडफेक, खिडक्यांच्या फोडल्या काचा; सहा जणांना अटक

बंगळूर : मंगळूर शहर पोलिसांनी (Mangalore City Police) रविवारी रात्री शहराच्या बाहेरील सुरतकल्ल येथील प्रार्थनास्थळावर दगडफेक केल्याच्या आरोपाखाली सहा जणांना अटक केली. भरत शेट्टी (वय २६, रा. कनकटला, सुरतकल), चेन्नप्पा शिवानंद चालवादी (१९), नितीन हडपाडा (२२, रा. कनकटला, सुरतकल), सुजित शेट्टी (२३, रा. चेलारू, सुरतकल), अण्णाप्पा (२४), होसबेट्टू गावातील प्रीतम शेट्टी (३४) यांना अटक करण्यात आली आहे.

कटिपल्लाच्या ३ रा ब्लॉकमधील प्रार्थनास्थळाच्या अध्यक्षांनी दिलेल्या तक्रारीनुसार रात्री साडेनऊच्या सुमारास दोन दुचाकींवर आलेल्या समाजकंटकांनी प्रार्थनास्थळावर दगडफेक केली. या घटनेत खिडक्यांच्या काचा फोडण्यात आल्या असल्याचा आरोप होत आहे.

पोलिसांनी आरोपींच्या शोधासाठी निरीक्षक महेश प्रसाद यांच्या नेतृत्वाखाली विशेष पथक तयार केले आहे. संशयित आरोपींना सोमवारी सकाळी कादरी मंजुनाथ मंदिर रोडजवळ अटक करण्यात आली. अटक करण्यात आलेल्या आरोपींकडून पोलिसांनी मोटार, दोन दुचाकी आणि चार मोबाईल फोन जप्त केले आहेत.