डीआयजींकडं दाद मागितली, पण..; घरी कोणी नसताना बलात्कार पीडितेनं लावून घेतला गळफास

उत्तर प्रदेश : संभल (Sambhal Uttar Pradesh) येथील एका अल्पवयीन सामूहिक बलात्कार पीडितेनं आरोपींवर कारवाई न झाल्यानं आत्महत्या केलीय. बलात्कार करणाऱ्यांवर कोणतीही कारवाई होत नसल्यानं तिनं आत्महत्येचं पाऊल उचललं. पीडितेनं सीओ ते डीआयजी यांच्याकडं कारवाईची विनंती केली. मात्र, कारवाई करण्याऐवजी पोलिस तिच्यावर दबाव आणत होते.

हे प्रकरण कुधफतेहगड पोलीस ठाण्याच्या (Kurh Fatehgarh Police Station) हद्दीमधील एका गावातील आहे. 15 जुलै रोजी एका 15 वर्षीय अल्पवयीन मुलीवर सामूहिक बलात्कार झाला होता. तिच्यासोबत हा घृणास्पद प्रकार त्याच गावात राहणाऱ्या एका तरुणानं त्याच्या चार साथीदारांसह केला. 15 जुलै रोजी पोलिसांनी एका आरोपीविरुद्ध पॉक्सो कायद्यांतर्गत (POCSO Act) गुन्हा दाखल केला होता.

पोलिसांचा आरोपीच्या साथीदारांना वाचवण्याचा प्रयत्न

पोलिसांनी आरोपीला अटक न करता त्याच्या साथीदारांना वाचवण्याचा प्रयत्न केल्याचा आरोप पीडितेच्या कुटुंबीयांनी केलाय. याबाबत पीडित कुटुंबीयांनी संबंधित अधिकाऱ्यांकडं तक्रारी केल्या. मात्र, विनवणीनंतरही पोलिसांनी आरोपींना अटक केली नाही, यामुळं पीडितेनं बुधवारी आत्महत्या केलीय. बलात्कार पीडितेच्या मृत्यूनंतर पोलीस अधीक्षक चक्रेश मिश्रा यांनी आरोपींना पकडण्यासाठी एसओजी टीम तयार केली असून उर्वरित आरोपींविरुद्ध पोक्सो कायद्याच्या कलमाखाली गुन्हा नोंदवलाय.

पोलिसांचा बंदोबस्तासाठी दबाव

पीडितेनं बुधवारी गळफास घेऊन आत्महत्या केली. तिची आई शाळेत गेली होती. ती परत आली, तेव्हा घराचा दरवाजा आतून बंद होता. शेजाऱ्यांच्या मदतीनं दरवाजा उघडला असता, आतमध्ये मुलीचा मृतदेह फासावर लटकलेला होता. पोलिस सातत्यानं बंदोबस्तासाठी दबाव टाकत होते, असा आरोप आईनं केला आहे. सध्या कोणत्याही आरोपींना अटक करण्यात आली नसल्याचं एसपी चक्रेश मिश्रा यांनी सांगितलं.