'प्रत्येक पापी व्यक्तीला भविष्य असते', बलात्कार-हत्येप्रकरणी SC कडून फाशीची शिक्षा रद्द

नवी दिल्ली : सर्वोच्च न्यायालयाने (Supreme Court) चार वर्षांच्या मुलीवर बलात्कार करून तिची हत्या केल्याप्रकरणी आरोपीला सुनावण्यात आलेली फाशीची शिक्षा रद्द केली आहे. न्यायमूर्ती यूयू ललित, एस. रवींद्र भट आणि बेला एम. त्रिवेदी यांच्या खंडपीठापुढे ही सुनावणी घेण्यात आली. यावेळी दिलेली शिक्षा ही गुन्हेगाराची अपंग मानसिकता सुधारण्यासाठी नेहमीच निर्णायक घटक असू शकत नाही, असं निरीक्षण यावेळी न्यायालयानं नोंदवलं आहे.

मध्य प्रदेशातील आरोपी फिरोजने एप्रिल २०१३ मध्ये एका चार वर्षीय मुलीवर लैंगिक अत्याचार करून तिची हत्या केली होती. त्याला ट्रायल न्यायालयाने फाशीची शिक्षा सुनावली होती. तसेच त्याचा सहआरोप राकेश चौधरी याला सात वर्षांच्या सक्तमजुरीची शिक्षा सुनावली होती. त्यानंतर दोन्ही आरोपींनी मध्य प्रदेश उच्च न्यायालयाच्या जबलपूर खंडपीठात धाव घेतली. यावेळी सहआरोप चौधरीची निर्दोष मुक्तता झाली. पण, न्यायालयाने फिरोजच्या फाशीची शिक्षा कायम ठेवली होती.

आरोपी फिरोजने मध्य प्रदेश उच्च न्यायालयाच्या निर्णयाला सर्वोच्च न्यायालयात आव्हान दिले होते. न्यायमूर्ती यूयू ललित, एस. रवींद्र भट आणि बेला एम. त्रिवेदी यांच्या खंडपीठापुढे ही सुनावणी घेण्यात आली. आता सर्वोच्च न्यायालयाने ही शिक्षा २० वर्षांच्या कारावासात बदलली आहे. यावेळी आयरिश कवी आणि नाटककार ऑस्कर वाइल्ड यांच्या प्रसिद्ध ओळींचा हवाला देत “संत आणि पापी यांच्यातील फरक एवढाच आहे की प्रत्येक संताला भूतकाळ असतो आणि प्रत्येक पाप्याला भविष्य असते”, असे न्यायालयाने म्हटले.