आठवीच्या विद्यार्थिनीने लिहलं सरन्यायाधीशांना पत्र; 'ही' मागणी झाली पूर्ण

नवी दिल्ली : लहान मुले ही देशाची सर्वांत मोठी ताकद असल्याचं म्हटलं जातं. उद्याचा बलसागर भारत हीच मुले घडवणार असल्यामुळे त्यांच्यावर केलेलं काम हे देशाच्या प्रगतीसाठीच पोषक ठरत असतं. लहान मुलांमध्ये बदल घडवून आणण्याची क्षमचा निश्चितच असते, मात्र आपण ती दुर्लक्षित करतो अथवा ती ओळखायला कमी पडतो. याचीच प्रचिती आणून देणारी एक घटना तेलंगानामध्ये घडली आहे. तेलंगानातील आठवीत शिकणाऱ्या एका मुलीने आपल्या एका समाजोपयोगी मागणीसाठी सरन्यायाधीश एन व्ही रमना यांना पत्र लिहलं आहे. विशेष म्हणजे तिच्या या पत्राचा सकारात्मक परिणाम देखील दिसून आला आहे.

तिच्या गावातील बससेवा कोरोना महासाथीच्या दरम्यान बंद करण्यात आली होती. मात्र, ही बससेवा पूर्ववत करुन होणाऱ्या अडचणींना दूर करावं, अशी विनंती करणारं पत्र या मुलीने सरन्यायाधीशांना लिहलं होतं. टीएसआरटीसीच्या एका प्रेस रिलीजमध्ये बुधवारी याबाबत माहिती देताना सांगण्यात आलं की, या पत्रानंतर सरन्यायाधीशांद्वारे सूचना देण्यात आल्यानंतर तेलंगाना राज्य रस्ते परिवहन मंडळ अर्थात टीएसआरटीसीने रंगा रेड्डी जिल्ह्यातील या गावात बस सेवा पूर्ववत केली आहे. या जिल्ह्यातील चिदेदु गावात राहणाऱ्या पी वैष्णवीने सरन्यायाधीशांना गावात बससेवा बहाल करण्यासंदर्भात पत्र लिहलं होतं. तिने आपल्या पत्रात लिहलं होतं की, तिच्या गावात बसची सुविधा नाहीये. त्यामुळे तिच्या भाऊ-बहिणींना शाळा आणि कॉलेजला जाण्यामध्ये अडचणींचा सामना करावा लागतो.

बससेवा नसल्याने तिच्या मित्र-मैत्रिणींना तसेच इतर गावकऱ्यांना त्रासाचा सामना करावा लागतो आहे. प्रवासासाठी ऑटोरिक्षाचा पर्याय निवडून अधिक खर्च करणे व्यवहार्य नाहीये. तसेच कोरोना महासाथी दरम्यान तिच्या वडिलांचा मृत्यू झाला आहे आणि तिची आई कमी वेतनामध्ये काम करते. तिच्या या पत्राच्या उत्तरामध्ये, सरन्यायाधीशांनी टीएसआरटीसीचे एमडी व्ही सी सज्जनार यांना मुलांच्या शिक्षणाच्या अधिकाराचा सन्मान करण्यासाठी बससेवा बहाल करण्यासाठीचा आदेश दिला. तसेच या मुलीच्या या प्रयत्नाचं कौतुक केलं.