Terrorist Abdul Salam Bhuttavi : दहशतवादी अब्दुल सलाम भुट्टावी याचा पाकिस्तानमधील पंजाब प्रांतातील तुरुंगात मृत्यू

लाहोर : मुंबईवर हल्ला करण्यासाठी ‘लष्करे तैयबा’च्या दहशतवाद्यांना प्रशिक्षण देणाऱ्या हाफिज अब्दुल सलाम भुट्टावी याचा पाकिस्तानमधील पंजाब प्रांतातील एका तुरुंगात मृत्यू झाला. दहशतवादाला निधी पुरविल्याप्रकरणी तो शिक्षा भोगत होता.

त्याने पंजाब प्रांतात लष्करे तैयबाचा तळ सुरु केला होता. मुंबईवर २००८ मध्ये झालेल्या दहशतवादी हल्ल्याचा सूत्रधार हाफिज सईद याचा तो मुख्य सहकारी होता. भुट्टावी याला २०१९ मध्ये अटक झाली होती. तेव्हापासून तो तुरुंगातच होता.

दोन दिवसांपूर्वी ७७ वर्षांच्या भुट्टावी याच्या छातीत दुखत असल्याने त्याला रुग्णालयात दाखल केले होते. आज ह्रदयविकाराच्या झटक्याने त्याचा मृत्यू झाला. हाफिज सईद हा देखील सध्या तुरुंगात असून त्याने भुट्टावी याच्या दफनविधीला हजर राहण्याची परवानगी मागितली होती. ती नाकारण्यात आली.