लष्करप्रमुख घेणार जम्मू विभागाचा आढावा

नवी दिल्ली : दहशतवादी कारवायांत वाढ झाल्यामुळे लष्करप्रमुख जनरल मनोज मुकुंद नरवणे जम्मू विभागाच्या दोन दिवसांच्या दौऱ्यावर दाखल झाले आहेत. ते सुरक्षा व्यवस्थेचा आढावा घेतील.

पूँच विभागात गेल्या पंधरवड्यात दहशतवाद्यांच्या हल्ल्यात नऊ जवानांचा बळी गेला आहे. १६-कोअर विभागात दहशतवाद्यांविरुद्धची मोहीम अजूनही सुरु आहे.यासंदर्भात लष्कराने जारी केलेल्या निवेदनात म्हटले आहे की, संघर्षाच्या ठिकाणांजवळील परिसराला लष्करप्रमुख भेट देतील आणि तेथील जवान, कमांडरशी संवाद साधतील. व्हाइट नाईट कोअरचे प्रमुख सुरक्षा स्थिती आणि कारवाईसाठी मोहिमांची सज्जता याविषयी अद्ययावत माहिती त्यांना देतील. ताबारेषेवरील सुरक्षा व्यवस्थेचे स्वरूप आणि दुर्गम प्रदेशात वरिष्ठ लष्करी अधिकारी आणि कमांडर यांच्याकडून राबविल्या जात असलेल्या मोहिमांविषयीही लष्करप्रमुखांना माहिती देण्यात येईल.