Road Accident : यात्रा करुन घरी परतणाऱ्या तीन मित्रांना मालवाहतूक गाडीनं चिरडलं; तिघांचा दुर्दैवी अंत

चिक्कोडी : मालवाहतूक मोटार व मोटारसायकल यांच्यात झालेल्या अपघातात (Road Accident) तिघे तरुण ठार झाल्याची घटना मंगळवारी रात्री घडली. हा अपघात चिक्कोडी-अंकली रस्त्यावर बसवनाळगड्डेजवळ झाला.

प्रशांत भैरू खोत (वय २२, रा. रुपिनाळ, ता. चिक्कोडी), सतीश कल्लाप्पा हिरेकोडी (वय २३, रा. केरूर, ता. चिक्कोडी) आणि यलगौडा चंद्रकांत पाटील (वय २२, रा. बेळगाव) अशी ठार झालेल्यांची नावे आहेत. याबाबत माहिती अशी, तिघे तरुण केरूर येथून चिक्कोडीला गेले होते. मंगळवारी गावात त्रैवार्षिक यात्रा होती.

त्यामध्ये यलगौडा व सतीश हे पाहुणे तर प्रशांत हा मित्र आहे. हे तिघे युवक संध्याकाळी चिक्कोडीला गेले होते. रात्री परत येत असताना तिघेही एकाच मोटारसायकलवरून केरूरकडे जात होते. यावेळी अंकलीकडून मालवाहू मोटार येत होती. या दोन्ही वाहनांची समोरासमोर धडक झाली.

बसवनाळगड्डे येथे हा अपघात झाला. त्यात प्रशांत व सतीश हे दोघे जागीच ठार झाले तर यलगौडा पाटील याला रुग्णालयामध्ये दाखल करण्यासाठी नेताना वाटेत त्याचा मृत्यू झाला. घटनेची माहिती मिळताच चिक्कोडी वाहतूक पोलिस ठाण्याचे उपनिरीक्षक अम्मीनभावी यांनी घटनास्थळी भेट देऊन पंचनामा केला. या घटनेची नोंद चिक्कोडी वाहतूक पोलिस ठाण्यात झाली आहे.