'.. तर सार्वजनिक जीवन सोडून देईन'; अधीर रंजन चौधरी यांची निलंबनावरील निर्णयानंतर पहिली प्रतिक्रिया

Suspension from Lok Sabha revoked Congress MP Adhir Ranjan Chowdhury

नवी दिल्ली- काँग्रेस खासदार अधीर रंजन चौधरी यांचे संसदेतील निलंबन मागे घेण्यात आले आहे. लोकसभा सचिवालयानं याबाबतचं अधिकृत पत्र प्रसिद्ध करुन याची माहिती दिली. बुधवारी (३० ऑगस्ट) रोजी लोकसभेच्या समितीपुढं अधीर रंजन चौधरींनी आपली बाजू मांडली होती. त्यानंतर त्यांचं निलंबन रद्द करण्याची शिफारस मंजूर करण्यात आली. निलंबनावरील निर्णयानंतर चौधरी यांनी पहिल्यांदाच प्रतिक्रिया दिली.

मी काही चुकीचं बोललं असेल तर सार्वजनिक जीवन सोडून देईन. माझं म्हणणं ते समजू शकले नसतील असं मला वाटतं. कारण संसदेत जे मी म्हटलं होतं ते योग्य आणि नियमाला धरुन होतं. कायद्याच्या विरोधात असं काहीही मी बोललो नाही. माझ्या वक्तव्याचा अर्थ त्यांना नीट लावता आला नाही. मला संसदेत स्पष्टीकरण विचारलं असतं तर मी तेथेच त्यांना स्पष्टीकरण दिलं असतं, असं ते म्हणाले.

सत्ताधारी काही नेत्यांनी पंतप्रधानांना खूष करण्यासाठी माझ्यावर टीका करायला सुरुवात केली. संसदेत बोलण्याचा अधिकार आहे. नियमानुसारच आम्ही बोलत असतो. पण, सत्ताधाऱ्यांना ते आवडेल, न आवडेल. काँग्रेसविरोधात जे अपशब्द वापरले जातात ते सर्व रिकॉर्डवर आहेत.सोनिया गांधी, राहुल गांधी यांच्यासह सर्व काँग्रेस नेत्यांविरोधात संसदेत अपशब्द वापरले जातात. याचा विचार कोण करेल, असं ते म्हणाले.

मी त्या दिवशीही सांगत होतो आणि आजही सांगतोय, संसदेत मी काही चुकीचं बोललो असेल तर मी पब्लिक लाईफ सोडून देईन. कारण मला पूर्ण विश्वास आहे मी काही चुकीचं बोललो किंवा चुकीचा शब्द वापरला नाही. कोणाला त्रास देण्यासाठी आम्ही संसदेत बोलत नाही, असं अधीर रंजन चौधरी म्हणाले.

संसदेत चुकीच्या वर्तनाचा ठपका अधीर रंजन चौधरी यांच्यावर ठेवण्यात आला होता. त्यानंतर अधीर रंजन चौधरी विशेषाधिकार समितीकडे गेले होते.लोकसभेच्या समितीनं चौधरींचं निलंबन रद्द करुन त्यांना खासदारकी पुन्हा बहाल करण्याची शिफारस केली . त्यानंतर लोकसभा सचिवालयानं त्यांना पुन्हा खासदारकी बहाल केली.