Fire News: नोएडातील कंपनीमध्ये भीषण आग; अग्निशमन दलाचे शर्थीचे प्रयत्न सुरु

नोएडाः नोएडा येथील सेक्टर-३मधील एका कंपनीत भीषण आग लागल्याची घटना आज घडली आहे. आग आटोक्यात आणण्यासाठी अग्निशमन दलाचे शर्थीचे प्रयत्न सुरु आहेत.

आगीची घटना घडताच कंपनीमधील कर्मचाऱ्यांनी जिवाच्या आकांताने धावाधाव केली. शुक्रवारी दुपारच्या दरम्यान ही आग लागली. घटनास्थळी अग्निशमन दलाच्या तीन गाड्या युद्धपातळीवर काम करत आहेत.

प्राथमिक माहितीनुसार, ही आगीची घटना शॉर्ट सर्किटमुळे लागली. आग लागताच कर्मचारी कंपनीच्या बाहेर धावले. या घटनेचा एक व्हीडिओसुद्धा समोर आलेला आहे. यामध्ये आगीचं भीषण स्वरुप आणि अग्निशमन दलाच्या कर्मचाऱ्यांचे शर्थिचं प्रयत्न दिसून येतायत.

आग एवढी भीषण होती की, घटनास्थळापासून कित्येक दुरपर्यंत धूर दिसत होता. यापूर्वीदेखील 25-26 ऑगस्टच्या मध्यरात्री नोएडा येथील दुसऱ्या एका कंपनीत आग लागली होती. त्या आगीत कंपनीचे मोठ्या प्रमाणावर नुकसान झाले होते. दरम्यान, आजच्या आगीमध्ये जीवितहानी झालेली नाही.