Karwar : पत्नी, मुलाला नदीत ढकलून व्यावसायिकानं स्वत: लावून घेतला गळफास; घटनेने कारवारात खळबळ

बंगळूर : कारवार (Karwar) तालुक्यातील गोपाशिट्टा येथील व्यावसायिक श्याम पाटील यांची पत्नी व मुलाने काळी नदीत उडी घेऊन आत्महत्या केल्यानंतर त्यांनीही गळफास घेऊन आत्महत्या केल्याची घटना घडली.

श्याम पाटील (वय ४०) हे गोव्यातील वेर्णा इंडस्ट्रियल एरियामध्ये कामगार पुरवठ्याचा व्यवसाय करत होते. मात्र, काल (ता. २८) रात्री त्यांनी पत्नी ज्योती पाटील (वय ३७) आणि १२ वर्षीय मुलगा दक्ष पाटील यांच्यासह आत्महत्या केली होती.

प्रथम कोडीबाग येथील काळी नदीत ज्योती पाटील आणि दक्ष पाटील यांना ढकलले, त्यानंतर तेथून ६० किमी अंतरावर गोव्यातील पाडी वनपरिक्षेत्रात श्याम पाटील यांनी गळफास लावून घेतला.

आई आणि मुलाचे मृतदेह देवबाग समुद्रकिनारी; तर श्यामचा मृतदेह पाडी येथे आढळून आला. आत्महत्येचे नेमके कारण समजू शकलेले नाही. चित्तकुल पोलिस ठाण्यात गुन्हा दाखल करण्यात आला असून तपास सुरू आहे.