Bullet Train : भारतातील पहिल्या बुलेट ट्रेन टर्मिनलचा व्हिडीओ रिलीज; रेल्वेमंत्र्यांनी शेअर केला नेत्रदीपक Video

नवी दिल्लीः केंद्रीय रेल्वेमंत्री अश्विनी वैष्णव यांनी अहमदाबाद येथील साबरमती येथे उभारण्यात आलेल्या मल्टिमॉडल ट्रान्सपोर्ट हब येथील पहिल्या बुलेट ट्रेन ट्रर्मिनलचा व्हिडीओ शेअर केला आहे.

अत्याधुनिक सुविधांसह सज्ज होत असलेली ही बुलेट ट्रेन अहमदाबाद-मुंबई अशी धावणार आहे. सदरील रेल्वे प्रकल्प जपान सरकारच्या तांत्रिक आणि आर्थिक सहाय्याने उभा रहात आहे. या प्रकल्पानंतर मुंबई आणि अहमदाबाद ही दोन मोठी शहरं २.०७ तासांच्या अंतराने जोडली जातील. या बुलेट ट्रेनचा वेग ताशी ३५० किलोमीटर असणार आहे.

बुलेट ट्रेनच्या ५०८ किलोमीटरच्या मार्गामध्ये समुद्राखालील मार्ग आणि बोगद्यांचाही समावेश आहे. या प्रकल्पासाठी अंदाजे १,०८,००० कोटी रुपये खर्च अपेक्षित आहे.

२०१७ मध्ये नरेंद्र मोदी आणि जपानचे माजी पंतप्रधान शिंजो आबे यांच्या उपस्थितीत बुलेट ट्रेन प्रकल्पाचा शुभारंभ करण्यात आलेला होता. या प्रकल्पाच्या यशस्वीतेनंतर दिल्ली-वाराणसी, दिल्ली-अहमदाबाद, मुंबई-नागपूर, मुंबई-हैदराबाद, चेन्नई-म्हैसूर, दिल्ली-अमृतसर हे प्रकल्प हाती घेण्याचं सरकारचं धोरण आहे.