Viral: शुद्ध नालायकपणा! 5 स्टार हॉटेलमध्ये फुकट जेवण्यासाठी कपलचा 'जुगाड' जाणून घ्याच

नवी दिल्ली- सोशल मीडियावर सद्या एका जोडप्याचा किस्सा व्हायरल होत आहे. फाईव स्टार हॉटेलमध्ये फुकट जेवण्यासाठी या जोडप्याने एक युक्ती लढवली आहे. अनेकांसाठी हा किस्सा आश्चर्यचकित करणारा आहे. उदित भंडारी नावाच्या एका युझरने यासंदर्भातील किस्सा सोशल मीडियावर पोस्ट केला आहे. त्यानंतर यावर युझर्स सोशल मीडियावर प्रतिक्रिया देत आहेत.

उदित भंडारी यांनी गुरुग्राममधील एका जोडप्याचा किस्सा शेअर केला आहे. हे जोडपे नेहमी मोठ्या हॉटेलमध्ये मोफत जेवण जेवतं. मोफत जेवण करण्यासाठी त्यांनी लढवलेली युक्ती तशी चुकीची आहे. पण, यावर युझर्स वेगवेगळ्या प्रतिक्रिया देत आहेत. भंडारी यांनी सांगितलं की, या जोडप्याला ते गुरुग्राममध्ये एक मित्राच्या घरी भेटले होते. यावेळी या जोडप्याने मोफत जेवण करण्याची ते काय शक्कल लढवतात हे सांगितलं होतं.

काय आहे जुगाड?

जोडपे कोणत्याही महागड्या हॉटेलमध्ये जेवण्यासाठी जाते. तिथे जेवण मागवतात आणि पोटभर जेवण करतात. जेवण झाल्यानंतर जेवणाच्या एका प्लेटमध्ये माशी टाकतात. त्यानंतर ते हॉटेलमधील मॅनेजरला बोलवतात आणि याबाबत तक्रार करतात. तुम्ही कसलं जेवण देत आहात असं म्हणत गोंधळ घालतात. हॉटेलच्या बदनामीच्या भीतीने मॅनेजर जोडप्याचे बील माफ करते. त्यामुळे त्यांना मोफत जेवायला मिळते.

जोडपे या सर्व प्रकाराला मजा म्हणून पाहते. विशेष म्हणजे त्यांची आर्थिक स्थिती खराब आहे अशातलीही गोष्ट नाही, असं भंडारी यांनी सांगितलं. ते पुढे सांगतात, जोडप्याला हे सांगताना खूप आनंद होत होता. अनेकदा अशा प्रकारचे फुकट जेवण केल्याचं त्यांनी अभिमानानं सांगितलं.

सोशल मीडियावर या जोडप्यावर टीका केली जात आहे. एकाने प्रतिक्रिया दिलीये की, जोडप्याकडे पैशाची कमी नाही, पण थोडी नैतिकतेची कमी दिसत आहे. एकाने म्हटलं की, अनेक श्रीमंत लोक असं करत असतात. अर्धवट जेवण झाल्यानंतर लोक अन्नाबाबत तक्रार करतात आणि फुकट खाण्याचा प्रयत्न करतात.

(टीप- ही बातमी सोशल मीडियावरील युझरच्या पोस्टवरून केली आहे. सकाळ माध्यम याची पुष्टी करत नाही.)