अग्निपथ’ योजनेतून तरुणांना मिळणार देशसेवेची संधी

पुणे - सैन्यात जाऊन देशसेवा करण्याचे तरुणांचे स्वप्न आता ‘अग्निपथ’ योजनेतून साकार होणार आहे. अग्निपथमध्ये निवड झालेल्या तरुणांना चार वर्षे तिन्ही सशस्त्र दलांत देशसेवेची संधी मिळणार आहे. त्यामुळे भारतीय लष्कर शारीरिकदृष्ट्या बळकट होणार असून, जवानांचे सरासरी वय ३२ वरून २६ होणार आहे’ असा विश्वास लष्कराच्या दक्षिण मुख्यालयाचे चीफ ऑफ स्टाफ लेफ्टनंट जनरल अरविंद वालिया यांनी बुधवारी (ता. १५) व्यक्त केला.

साडेसतरा ते एकवीस वर्षे वयोगटातील तरुणांना या योजनेचा लाभ घेता येणार आहे. भरती होणाऱ्या तरुणांपैकी २५ टक्के तरुणांना चार वर्षांचा सेवा कालावधी संपल्यानंतर सेवेत कायम केले जाणार आहे. तसेच यापुढे लष्कराची भरती प्रक्रिया आता ‘अग्निपथ’ योजनेच्या माध्यमातूनच होणार आहे, वालिया यांनी सांगितले. ‘अग्निपथ’ योजना संरक्षण मंत्री राजनाथ सिंह यांनी मंगळवारी (ता.१४) तिन्ही संरक्षण दलप्रमुखांच्या उपस्थितीत जाहीर केली. या योजनेची सविस्तर माहिती देण्यासाठी दक्षिण मुख्यालयाच्या वतीने आयोजित पत्रकार परिषदेत लेफ्टनंट जनरल वालिया बोलत होते.

‘या योजनेअंतर्गत देशभरातील सर्व जिल्ह्यांमधून अग्निविरांची भरती केली जाईल. या तरुण अग्निविरांमुळे लष्करात उत्साह, चैतन्य आणि आत्मविश्वास निर्माण होणार आहे. त्याचबरोबर तरुणांमध्ये राष्ट्रवादाचा प्रसार होणार असून, त्यांच्या चार वर्षांच्या लष्करी सेवेनंतर समाजाला कुशल मनुष्यबळ मिळणार आहे,’ असे वालिया यांनी नमूद केले.

सहा महिन्यांचे प्रशिक्षण -

ब्रिगेडियर पंकज नंदा यांनी ‘अग्निपथ’ योजनेअंतर्गत भरती प्रक्रिया आणि सेवा पॅकेजची माहिती दिली. येत्या ९० दिवसांत अग्निविरांची पहिली तुकडी लष्करात भरती होईल. त्यानंतर त्यांना सहा महिने प्रशिक्षण दिले जार्इल, असेही त्यांनी सांगितले.