Shivaji University : 'या' कारणामुळं शिवाजी विद्यापीठाच्या परीक्षा स्थगित; कधी घेतली जाणार Exam? जाणून घ्या

कोल्हापूर : कोल्हापूर, सांगली, सातारा जिल्ह्यातील अतिवृष्टीच्या इशारामुळे शिवाजी विद्यापीठाने (Shivaji University) गुरुवार, शुक्रवारी होणाऱ्या पदवी आणि पदव्युत्तर अभ्यासक्रमांच्या परीक्षा स्थगित करण्याचा निर्णय घेतला आहे.

शनिवार, रविवारची सुटी असल्याने सोमवारपासून या परीक्षा पूर्ववत सुरू होण्याची शक्यता आहे. भारतीय हवामान खात्याने विद्यापीठ परिक्षेत्रातील या तिन्ही जिल्ह्यांमध्ये अतिवृष्टीचा इशारा दिला आहे. त्यामुळे विद्यापीठाने बुधवार आणि गुरुवारच्या परीक्षा स्थगित केल्या होत्या.

त्यामध्ये आणखी एका दिवसाची वाढ केली आहे. त्यानुसार शुक्रवारी होणाऱ्या बी. टेक., बी. फार्मसी., एमबीए., एमसीए या अभ्यासक्रमांच्या परीक्षा स्थगित केल्या आहेत. त्यासाठी नोंदणी केलेल्या विद्यार्थ्यांची संख्या सुमारे ३४०० इतकी आहे.

परीक्षा व मूल्यमापन मंडळाने आज एम. जे., एम. ए. सोशालॉजी., इनऑरगॅनिक केमिस्ट्री अभ्यासक्रमांच्या सहा परीक्षांचे निकाल जाहीर केले आहेत. मार्च-एप्रिल सत्रातील एम. फिल., प्री पीएचडी कोर्सवर्क अभ्यासक्रमाच्या परीक्षा पूर्वनियोजनानुसार ७ ऑगस्टपासून सुरू होणार होत्या. त्यामध्ये आता बदल केला आहे. या परीक्षा आता २८ ऑगस्टपासून सुरू होतील, अशी माहिती परीक्षा मंडळाचे संचालक डॉ. अजितसिंह जाधव यांनी सांगितले.

या अभ्यासक्रमांच्या परीक्षा स्थगित

बी. टेक., बी. फार्मसी., एमबीए., एमसीए