Pune News : ‘डिझाइन’मध्ये करिअर करायचंय? मग या फेस्टिव्हलची अनोखी संधी चुकवू नकाच !

Pune News : डिझाइनचं काम कोण करतं, हे डिझाइन कसं करायचं, हे कुठं शिकवलं जातं का?, डिझाइनचा उपयोग आणि महत्त्व काय? डिझाइन क्षेत्रात करिअर कसे करता येईल? त्यासाठी अभ्यासक्रम कोणते आहेत?

अशा अनेक प्रश्नांची उत्तरे ‘डिझाइन एज्युकेशन फेस्टिव्हल’मध्ये विद्यार्थी आणि त्यांच्या पालकांना मिळणार आहेत. हा फेस्टिव्हल येत्या शनिवारी - रविवारी (ता. १३ आणि १४) बाणेरमधील ‘यशवंतराव चव्हाण अॅकॅडमी ऑफ डेव्हलपमेंट अॅडमिनिस्ट्रेशन’ (यशदा) येथे होणार आहे. सकाळी १० ते रात्री १० दरम्यान तो सर्वांसाठी खुला आहे.

‘असोसिएशन ऑफ डिझायनर्स ऑफ इंडिया’ची पुणे शाखा आणि सकाळ माध्यम समूह यांनी हा फेस्टिव्हल आयोजित केला आहे. यात अनेक मान्यवर, तज्ज्ञ शिक्षकांच्या कार्यशाळा, मार्गदर्शक सत्रे होतील. नामवंत डिझाइन शिक्षण संस्थांचा यात सहभाग असेल.

फेस्टिव्हलमध्ये ‘फ्ली-मार्केट’ही असेल. डिझाइन क्षेत्रात करिअर करण्याची इच्छा असलेल्या प्रत्येकासाठी हा फेस्टिव्हल म्हणजे उत्तम संधी आहे. त्यात अनेक नामांकित शैक्षणिक संस्था व त्यांचे प्रतिनिधी उपस्थित राहणार आहेत. त्यांच्याकडून डिझाइन क्षेत्रातील विविध अभ्यासक्रम व शैक्षणिक संस्थांमधून दिल्या जाणाऱ्या सुविधांबद्दल माहिती दिली जाणार आहे.

याबरोबरच प्रॉडक्ट डिझाइन, ग्राफिक डिझाइन, ॲनिमेशन, यूएक्स डिझाइन, फॅशन डिझाइन, सर्व्हिस डिझाइन या डिझाइनच्या विविध शाखांमधील व्यावसायिक तज्ज्ञांकडून त्यांचे अनुभव ऐकण्याची संधीही उपस्थितांना मिळणार आहे. या क्षेत्रातील विपुल संधींबद्दलही विद्यार्थ्यांना मार्गदर्शन मिळणार आहे.

असोसिएशन ऑफ डिझायनर्स ऑफ इंडियाच्या पुणे शाखेचे अध्यक्ष योगेश दांडेकर म्हणाले, ‘‘एखादी छान वस्तू जी आपले जीवन सुखकर करते, ती खूप उपयोगी असते आणि आपल्याला आवडते, आपण सहज म्हणून जातो की ‘किती छान डिझाइन केले आहे.’

ही उत्कट प्रतिक्रिया फक्त त्या वस्तूच्या दिसण्यावरून नसते, पण आपल्याला आलेल्या अनुभवाचे सहज केलेले वर्णन असते. डिझायनर होण्यासाठी काही कौशल्य आत्मसात करणे आवश्यक असते. त्याची माहिती विद्यार्थ्यांना या फेस्टिव्हलमधून मिळेल.’’