तांत्रिक प्रवेशासाठी (टीईएस-४७) ऑनलाइन अर्ज प्रक्रिया सुरू

पुणे - भारतीय सैन्यदलाने तांत्रिक प्रवेश प्रक्रियेसाठी (टीईएस-४७) (TES-47) ऑनलाइन अर्ज प्रक्रिया (Online Form Process) सुरू केली आहे. ही प्रवेश प्रक्रिया केवळ मुलांसाठी असून उमेदवारांना (Candidate) येत्या २३ फेब्रुवारीपर्यंत अर्ज भरता येणार आहे.

विज्ञान शाखेतून बारावी उत्तीर्ण झालेल्या तसेच जेईई मेन्सची परिक्षा देणाऱ्या विद्यार्थ्यांना या प्रक्रियेअंतर्गत अर्ज भरात येणार आहे. यासाठी उमेदवारांचे बारावीमध्ये गणित, रसायनशास्त्र आणि भौतिकशास्त्र या तिन्ही विषयांमध्ये एकूण ६० टक्के किंवा त्याहून अधिक गुण असणे आवश्‍यक आहे. या प्रवेश प्रक्रियेमध्ये लेखी परिक्षा नसून उमेदवारांना थेट ‘सर्व्हिस सिलेक्शन बोर्डाच्या मुलाखती’ (एसएसबी) देता येणार आहे.

टीईएससाठी उमेदवारांची वयोमर्यादा साडेसोळा ते साडे एकोणीस अशी ठेवण्यात आली आहे. ही प्रक्रिया जुलै २०२२ च्या अभ्यासक्रमासाठी असून यामध्ये एकूण ९० पदे जागा ठेवण्यात आल्या आहेत. परंतु यामध्ये बदल होण्याची शक्यता आहे. चार वर्षांच्या प्रशिक्षणानंतर उमेदवार सैन्यदलात कायम स्वरूपी आयोगांतर्गत (पर्मनंट कमिशन) अधिकारी म्हणून काम करतील.

संबंधित प्रक्रियेयाबाबतची माहिती सैन्यदलाच्या अधिकृत संकेतस्थळावर उपलब्ध आहे. इच्छुक उमेदवारांनी संबंधित माहिती किंवा ऑनलाइन अर्ज भरण्यासाठी www.joinindianarmy.nic.in या अधिकृत संकेत स्थळाचा वापर करावा.