सार्वजनिक आरोग्‍य विभागात भरती; 'असा' करता येईल अर्ज

नाशिक : राज्यभरात सार्वजनिक आरोग्‍य विभागांतर्गत आरोग्‍य संस्‍थांमध्ये भरती (recruitment) होणार आहे. महाराष्ट्र वैद्यकीय व आरोग्‍यसेवा ‘गट अ’ संवर्गातील वैद्यकीय अधिकारी सरळ सेवेतून भरती केले जाणार आहेत. या एक हजार १५२ पदांकरिता पात्र उमेदवारांना ऑनलाइन स्वरूपात अर्ज करण्यासाठी २१ ऑगस्‍टपर्यंत मुदत दिलेली आहे.

सार्वजनिक आरोग्‍य विभागात एक हजार १५२ पदांवर भरती
सार्वजनिक आरोग्‍य विभागाने यासंदर्भात सविस्‍तर दिशानिर्देश जारी केले आहेत. त्‍यानुसार ऑनलाइन अर्जासोबत महाराष्ट्र वैद्यकीय परिषदेकडील वैध नोंदणी प्रमाणपत्रासह विविध चौदा प्रकारची कागदपत्रे अपलोड करायची आहेत. पदांच्‍या संख्येत वाढ किंवा घट होण्याची शक्‍यता असल्‍याचे, तसेच विशेषज्ञ शाखेतील पदव्‍युत्तर पदविका, पदवीधारक उमेदवारांना प्राधान्‍य दिले जाईल, असेही पत्रकात स्‍पष्ट केले आहे. अतिविशेषोपचारतज्‍ज्ञ, बालरोगतज्‍ज्ञ, भिषक, भूलतज्‍ज्ञ, स्‍त्रीरोगतज्‍ज्ञ, शल्यचिकित्सक, कान-नाक-घसातज्‍ज्ञ, नेत्ररोगतज्‍ज्ञ, अस्थिव्‍यंगोपचारतज्‍ज्ञ, त्‍वचारोगतज्‍ज्ञ, शरीरविकृतीतज्‍ज्ञ, रक्‍तसंक्रमण अधिकारी, क्ष-किरणतज्‍ज्ञ, मानसोपचारतज्‍ज्ञ, पीएसएम अशा पंधरा शाखांतील तज्‍ज्ञांची भरती केली जाणार आहे.
प्रचलित नियमानुसार उमेदवाराचे वय ९ ऑगस्टला ३८ वर्षांपेक्षा जास्‍त नसावे. मागासवर्गीय उमेदवारांच्‍या बाबतीत नियमाप्रमाणे वयाची अट शिथिल असेल. अर्ज दाखल करण्याच्‍या प्रक्रियेला सुरवात झालेली आहे.

...असे करता येईल अर्ज
केवळ ऑनलाइन माध्यमातूनच अर्ज करता येणार आहे. सरळ सेवेने पदभरतीसंदर्भातील माहिती http://arogya.maharashtra.gov.in या संकेतस्‍थळावर उपलब्‍ध आहे. अर्ज दाखल करण्यासाठी http://www.maha-arogya.in/application_form.aspx या संकेतस्‍थळाला भेट द्यावी.