राज्यात यंदा १,३३८ नवी महाविद्यालये

मुंबई - राज्यातील (Maharashtra) ११ विद्यापीठांतर्गत यंदा पदवी, पदुव्यत्तर आणि अल्पमुदतीचे अभ्यासक्रम देणाऱ्या तब्बल १ हजार ३३८ नव्या महाविद्यालयांची (New Colleges) भर पडणार आहे. यासाठी नुकतेच महाराष्ट्र राज्य शिक्षण व विकास आयोगाने (माहेड) २०२२-२३ या शैक्षणिक वर्षाच्या वार्षिक बृहत्आराखड्याला मान्यता दिली.

उच्च व तंत्र शिक्षण विभागाने २०२२-२३ या शैक्षणिक वर्षासाठी नवीन महाविद्यालये सुरू करण्यासाठी आवश्यक असलेले इरादा पत्र आणि अंतिम मान्यता देण्यासाठी ३० एप्रिल ते १७ ऑगस्ट २०२२ या कालावधीपर्यंत मुदतवाढ दिली होती. त्यासाठी विद्यापीठ कायद्यात सुधारणा करणारे विधेयकही मंजूर करण्यात आले होते. त्या पार्श्वभूमीवर नुकतेच नव्या महाविद्यालयांसाठी ‘माहेड’कडून बृहत्आराखड्याला मंजुरी मिळाली. त्यानंतर आता विद्यापीठांकडून त्याबाबत जाहिराती प्रसिद्ध केल्या जातील. नव्या महाविद्यालयांच्या प्रस्तावांमध्ये पारंपरिक अभ्यासक्रमांपेक्षा व्यावसायिक अभ्यासक्रमांचे प्रमाण अधिक आहे.

नव्या महाविद्यालयांच्या प्रस्तावांमध्ये सर्वाधिक प्रमाण हे मुंबई विद्यापीठाच्या कार्यक्षेत्रात आहे. मुंबई विद्यापीठाने २५५, त्यापाठोपाठ एसएनडीटी महाविद्यालयाने २०३, तर सावित्रीबाई फुले पुणे विद्यापीठाने १६५ नवी महाविद्यालये सुरू करण्यासाठीची बिंदू नामावली दिली आहे. यामध्ये विधी, फॅशन डिझाईन, फार्मसीसोबतच विविध प्रकारच्या व्यावसायिक अभ्यासक्रमांचा समावेश आहे. दुसरीकडे शहरी भागात मराठी माध्यमांसोबत पारंपरिक कला शाखेच्या नव्या महाविद्यालयांकडे मागणी घटली असल्याचेही समोर आहे.

नव्या महाविद्यालयांच्या प्रस्तावासाठी अर्ज

मुंबई विद्यापीठाच्या कार्यक्षेत्रात २५५ नवे महाविद्यालयांना मान्यता दिली जाणार आहे. त्यासाठी ३० एप्रिलपर्यंत विद्यापीठाकडे प्रस्ताव पाठवण्यासाठी विद्यापीठाने सूचना जारी केल्या आहेत. जाहिरातीद्वारेही सदर माहिती मागवली जाणार असल्याचे विद्यापीठाकडून सांगण्यात आले. बृहत्आराखड्यात देण्यात आलेल्या स्थळबिंदूशिवाय इतर ठिकाणी सादर करण्यात येणाऱ्या कोणत्याही नव्या महाविद्यालयांच्या प्रस्तावाला मान्यता दिली जाणार नसल्याचेही प्रशासनाकडून स्पष्ट करण्यात आले आहे.

नव्या महाविद्यालयांची प्रस्तावित संख्या

• मुंबई विद्यापीठ - २५५

• सावित्रीबाई फुले पुणे विद्यापीठ - १६५

• सं. तु. म. नागपूर विद्यापीठ - १००

• डॉ. बा. आं. म. वि. औरंगाबाद - ९२

• पु. अ. हो. विद्यापीठ, सोलापूर - ४६

• शिवाजी विद्यापीठ कोल्हापूर - १०५

• स्वा. रा. तीर्थ विद्यापीठ नांदेड - ९६

• संत गा.बा.अमरावती विद्यापीठ - ८९

• गोंडवाना विद्यापीठ, गडचिरोली - ७६

• क.ब.चौ. विद्यापीठ जळगाव - १११

• एसएनडीटी विद्यापीठ - २०३

• एकूण - १,३३८