पुणे - महात्मा ज्योतिबा फुले संशोधन व प्रशिक्षण संस्थेच्यावतीने (महाज्योती) केंद्रीय लोकसेवा आयोगाच्या (यूपीएससी) प्रशिक्षणासंदर्भात विद्यार्थ्याभिमूख निर्णय घेण्यात आला आहे. दिल्लीतील महागड्या प्रशिक्षणाऐवजी विद्यार्थ्यांना आता पुण्यात मराठी माध्यमातून प्रशिक्षण घेण्याची संधी देण्यात येणार आहे. दै. ‘सकाळ’नेही यासंदर्भात वृत्त प्रसिद्ध करत विद्यार्थ्यांची व्यथा मांडली होती.
मागासवर्गीय प्रवर्गातील जास्तीत जास्त विद्यार्थी ‘यूपीएससी’ परीक्षा उत्तीर्ण व्हावे म्हणून, ‘महाज्योती’च्यावतीने विशेष तयारी करून घेण्यात येते. यासाठी दिल्ली आणि पुण्यात प्रशिक्षणासाठी शिष्यवृत्ती देण्यात येते. असे असतानाही दिल्लीतील प्रशिक्षणाकडे विद्यार्थ्यांनी पाठ फिरविल्याचे निदर्शनास आले होते. ज्यामध्ये जवळपास २०२ पेक्षा जास्त विद्यार्थ्यांनी स्वतःचे प्रवेश रद्द केले होते.
अवाढव्य खर्च आणि मराठीतील नोट्सच्या अभावामुळे विद्यार्थ्यांनी दिल्लीतील प्रवेश नाकारल्याचे समजले होते. इंग्रजीतील प्रशिक्षणामुळे गुणवत्तेवर परिणाम होतो. तसेच मिळणारी शिष्यवृत्ती आणि दिल्लीतील महागड्या खर्चाचा कोणताच ताळमेळ नसल्याचे विद्यार्थ्यांनी सांगितले.
म्हणून पुण्यातील प्रशिक्षणासाठी अधिक जागा द्याव्यात, तसेच दिल्लीसाठी निवड झालेल्या विद्यार्थ्यांना पुण्यात उपकेंद्र सुरू करावे, अशी मागणी उमेदवारांनी केली होती. अखेरीस महाज्योतीने याची दखल घेत सुधारित नियम प्रसिद्ध केले आहे.
इंग्रजी माध्यमामुळे आमच्या गुणवत्तेवर परिणाम होत होता. दिल्लीतील प्रशिक्षण सर्वच विद्यार्थ्यांच्या हिताचे नव्हते. दैनिक सकाळने यासंदर्भात बातमी देत विद्यार्थ्यांची बाजू मांडली होती. अखेरीस ‘महाज्योती’ने आता दिलासादायक निर्णय घेतला आहे.
- फारुख, ‘महाज्योती’चा विद्यार्थी
‘यूपीएससी’ प्रशिक्षणासाठी दिल्लीतील जागा - १०००
पुण्यातील जागा - ७५०
बदलासाठी अर्ज करण्याची अंतिम मुदत - २३ फेब्रुवारी
असा आहे नवा नियम
ज्या विद्यार्थ्यांची ‘यूपीएससी’ प्रशिक्षणासाठी यापूर्वी निवड झाली होती, परंतु विविध कारणामुळे ते रुजू होऊ शकले नव्हते, अशा विद्यार्थ्यांना वाढलेल्या जागांनुसार मराठी माध्यम (पुणे) करिता सामावून घेण्याची संधी देण्यात येत आहे. सर्व विद्यार्थ्यांनी परिपत्रकाचे व अर्जाचे काळजीपूर्वक अवलोकन करावे.
आपली यापूर्वी ‘यूपीएससी’ प्रशिक्षणासाठी निवड झाली असल्यास आणि आपण प्रशिक्षणाला रुजू न झाले असल्यास, आपला अर्ज दिलेल्या ई-मेल आयडीवर विहित मुदतीत सादर करावा, असे आवाहन महाज्योतीने केले.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.