'एका म्यानात दोन तलवारी राहणार नाहीत, निवडणुकीत आम्ही ओबीसींबरोबर राहणार'; काय म्हणाले प्रकाश आंबेडकर?

छत्रपती संभाजीनगर : ‘‘भाजपसह काँग्रेस, राष्ट्रवादी काँग्रेस (शरदचंद्र पवार) पक्ष आणि शिवसेना (उद्धव बाळासाहेब ठाकरे) आरक्षण विरोधी असल्याने आता आरक्षणवाद्यांना ‘वंचित’शिवाय पर्याय राहिला नाही,’’ असा दावा वंचित बहुजन आघाडीचे प्रमुख ॲड. प्रकाश आंबेडकर (Adv. Prakash Ambedkar) यांनी सोमवारी पत्रकार परिषदेत केला.

विधानसभा निवडणुकीत #ElectionWithSakal ओबीसी समूह (OBC Community) मराठ्यांना मतदान करणार नाही तर मराठा समूह हा ‘ओबीसीं’ना मतदान करणार नाही. एका म्यानात दोन तलवारी राहणार नाहीत. मनोज जरांगे यांची मागणी ही ‘ओबीसी’ कोट्यातून आरक्षण मिळावे अशी आहे. पण ‘ओबीसीं’चा त्याला विरोध आहे.

त्यांचे म्हणणे कायदेशीर आहे. त्यामुळे आम्ही या निवडणुकीत ‘ओबीसींबरोबर राहण्याचा निर्णय घेतल्याचे आंबेडकर यांनी स्पष्ट केले. सर्वोच्च न्यायालयाने दिलेल्या उपवर्गीकरण व क्रिमिलिअरचा निर्णय आम्हाला मान्य नाही, मुळात सर्वोच्च न्यायालयाला निर्णय देण्याचाच अधिकार नाही, असे ते म्हणाले.

हरियानाच्या निवडणुकीतून भाजप आणि काँग्रेसची साटेलोटे असल्याचे स्पष्ट झाले आहे. तेथील दलितांनी सावधानतेचा इशारा दिलेला आहे. आता आम्हीही दलितांना सावधानतेचा इशारा देत आहोत.

-प्रकाश आंबेडकर, प्रमुख, वंचित बहुजन आघाडी