Chandgad Assembly Election 2024 Results : चंदगड विधानसभा मतदारसंघात पाचही तुल्यबळ उमेदवार निवडणूक रिंगणात आल्याने या ठिकाणची निवडणूक नेमकी कोण जिंकणार, याबाबत मोठ्या चर्चा झाल्या होत्या. अनेक तर्कवितर्क लढविण्यात आले. मात्र, या सगळ्याला छेद देत भाजपाचे बंडखोर उमेदवार शिवाजी पाटील यांनी जायंट किलरची भूमिका घेत मोठ्या मताधिक्याने विजय मिळविला.
सर्वच पक्षाच्या कार्यकर्त्यांनी मतदान झाल्यावर जी आकडेमोड मांडली होती, त्याच्याही पुढे मतदानामध्ये आकडे दिसून आले. महायुतीकडून राजेश पाटील, महाविकास आघाडीकडून नंदा बाभूळकर, भाजपचे बंडखोर शिवाजी पाटील, काँग्रेसचे बंडखोर अप्पी पाटील यांच्यासह जनसुराज्यचे मानसिंग खोराटेही रिंगणात आले होते.
चंदगड विधानसभा निवडणुकीसाठी महायुतीतील राष्ट्रवादी काँग्रेस पक्षाने राजेश नरसिंगराव पाटील यांना उमेदवारी दिली होती. तर, महाविकास आघाडीतील राष्ट्रवादी काँग्रेस शरदचंद्र पवार पक्षाने कुपेकर-बाभुळकर नंदाताई ऊर्फ नंदिनी यांना उमेदवार दिली होती.