दापोली : कोकणातील दापोली विधानसभा मतदारसंघात शिवसेना आमदार योगेश कदम यांनी त्यांचा गड राखला आहे. राष्ट्रवादीतून उद्धव ठाकरे यांच्या शिवसेनेत आलेले संजय कदम यांचा त्यांनी पराभव केला. योगेश कदम यांनी पहिल्या फेरी पासून घेतलेली आघाडी शेवटच्या फेरीपर्यंत कायम ठेवली.
दापोली विधानसभा मतदारसंघातून (Dapoli Assembly Constituency) महायुतीचे उमेदवार योगेश कदम (Yogesh Kadam) हे दुसऱ्यांदा निवडणुकीच्या रिंगणात होते. तर, महाविकास आघाडीतील शिवसेना ठाकरे पक्षाचे संजय कदम (Sanjay Kadam) यांच्याशी त्यांची लढत होती. कदम हेही याच मतदारसंघातून दुसऱ्यांदा विधानसभेच्या निवडणुकीत उतरले होते. या मतदारसंघात अन्य ९ उमेदवार असले तरीही मुख्य लढत ही महायुतीमधील शिवसेनेचे योगेश कदम विरुद्ध महाविकास आघाडीमधील शिवसेना (उद्धव बाळासाहेब ठाकरे) पक्षाचे संजय कदम यांच्यात होती.