सबस्क्राईब करा
जयपूर: राजस्थानचे मुख्यमंत्री अशोक गेहलोत यांनी शुक्रवारी त्यांच्या सोशल मीडिया हँडलवरुन एक व्हिडिओ पोस्ट केला आहे. या व्हिडिओमध्ये सचिन पायलट हे काँग्रेसच्या उमेदवारांना मतदान करण्याचे आवाहन करताना दिसत आहेत.
गेहलोत आणि माजी मुख्यमंत्री पायलट यांच्यातील संघर्ष संपला असून दोघांमध्ये समेट झाला असल्याचा संदेश देण्यासाठीच हा व्हिडिओ शेअर केला असल्याचे मत राजकीय विश्‍लेषकांकडून व्यक्त केले जात आहे.
गेहलोत यांनी फेसबुक, इंस्टाग्राम आणि एक्सवर, पायलट यांचा सुमारे पावणे दोन मिनिटांचा व्हिडिओ पोस्ट केला आहे. हा व्हिडिओ सध्या राजस्थानातील राजकीय वर्तुळात चर्चेचा विषय ठरत आहे.
पायलट यांचे आवाहन
गेहलोत यांनी पोस्ट केलेल्या व्हिडिओमध्ये, पायलट यांनी राजस्थानातील नागरिकांना पुन्हा एकदा राज्यात काँग्रेसचे सरकार निवडून देण्याचे आवाहन केले आहे.‘‘आम्ही या निवडणुकीच्या निमित्ताने राज्यातील विविध ठिकाणी शेकडो सभा घेतल्या आहेत. मात्र तरी देखील काही भागात आम्ही पोहोचू शकलो नाही.
त्यामुळे या व्हिडिओच्या माध्यमातून मी आपल्या सर्वांना विनंती करतो की, राज्याच्या विकासाची गती कायम ठेवण्यासाठी आणि राज्याच्या प्रगतीसाठी काँग्रेसला मतदान करावे. राजस्थानमध्ये भाजपची सत्ता आल्यास काँग्रेस सरकारच्या काळात सुरू करण्यात आलेल्या योजना बंद करण्याचा भाजपचा डाव असून आपण त्यांचे हे मनसुबे हाणून पाडू या’’ असे आवाहन पायलट यांनी या व्हिडिओच्या माध्यमातून केले आहे.
काय म्हणाले होते पंतप्रधान मोदी?
गांधी कुटुंबावर निशाणा साधताना पीएम मोदींनी राजेश पायलट आणि सचिन पायलट यांच्यावर काँग्रेसने अन्याय केल्याचा ठपका ठेवला आहेत. त्यांनी सलग दुसऱ्या दिवशी यासंदर्भात भाष्य केलं. ते म्हणाले की, मी काँग्रेसच्या शाही परिवारावर काही प्रश्न उपस्थित केले होते. त्यामुळे तीर निशाण्यावर लागला आणि अर्ध्या तासात संपूर्ण काँग्रेस हादरली.
कानाकोपऱ्यातून काँग्रेसवाले चावचाव करत बाहेर पडले. त्यांना माहितंय, मोदींनी अशी गोळी चालवलीय, की काँग्रेसचं जगणं अवघड होऊन जाईल. राजेश पायलट यांच्याविषयी काँग्रेस विधानं करीत आहे आणि पत्रकार परिषदा घेत आहे. काँग्रेस पूर्ण ताकदीने खोटं बोलत आहे की, काँग्रेसने कधीच पायलट यांचा अपमान केला नाही. परंतु खऱ्या प्रश्नांची उत्तरं ते देत नाहीयेत.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
