Telangana Assembly Election : काँग्रेसचा तारणहार हैदराबादमध्ये दाखल, विजयाच्या उंबरठ्यावर घोडेबाजार रोखण्यासाठी DK शिवकुमार सज्ज

Telangana Assembly Election Results : तेलंगणामध्ये विधानसभा निवडणुकीच्या मतमोजणीला सुरुवात झाली आहे. सुरुवातीपासूनच काँग्रेस मोठ्या प्रमाणात आघाडीवर आहे. त्यामुळे याठिकाणी आपण नक्कीच विजय मिळवू असा विश्वास काँग्रेसला आहे. याच पार्श्वभूमीवर कर्नाटकचे उपमुख्यमंत्री डीके शिवकुमार देखील हैदराबादला पोहोचले आहेत. ते हॉटेल ताजकृष्णा येथून मतमोजणी प्रक्रियावर लक्ष ठेवणार आहेत.

मतमोजणीवर ठेवणार लक्ष

शिवकुमार (DK Sivakumar) यांच्यासोबत कर्नाटकातून काही आमदार देखील तेलंगणामध्ये आले आहेत. प्रत्येक मतदारसंघात एक-एक आमदार पाठवण्यात येणार आहे. हे आमदार मतमोजणी प्रक्रियेवर लक्ष ठेवतील. विजेत्या उमेदवाराला सुरक्षितपणे हैदराबादला आणण्याची जबाबदारी कर्नाटकच्या आमदारांवर असणार आहे.

विजयापूर्वीच बॅनरबाजी

निकाल येण्यापूर्वीच काँग्रेसने ठिकठिकाणी बॅनरबाजी केली आहे. यामध्ये विजयी उमेदवारांची नावं देऊन त्यांचं अभिनंदन देखील केलं आहे. रेवंत रेड्डी, भट्टी विक्रमार्का, सीथाक्का, मधुयाश्की, मैनामपल्ली हनुमंथा राव, फिरोज खान, कोंडा सुरेखा, जगारेड्डी यांच्यासह अनेक उमेदवारांची नावं या बॅनर्समध्ये छापण्यात आली आहेत.

पहिल्या कलांमध्ये काँग्रेसला बहुमत

निवडणुकीचे पहिले कल हाती येण्यास सुरुवात झाली आहे. काँग्रेसने या कलांमध्ये बहुमताचा आकडा गाठला आहे. बीआरएस मोठ्या प्रमाणात पिछाडीवर आहे. तर भाजप आणि एमआयएम यांचा सुपडा साफ होण्याची चिन्हं दिसत आहेत.