Breakfast recipe : ब्रेडपासून बनलेला ढोकळाही असतो स्वादिष्ट; पहा कसा बनवायचा

ब्रेड हा सर्वांचाच आवडता पदार्थ आहे. त्यामुळे प्रत्येकाच्या घरी तो आठवड्यातून एकदा का होईना खाल्ला जातो. पण, ब्रेडसोबत जाम, बटरच नाश्त्याला दिले जाते. तसेच तो शिल्लक राहिला तर त्याचा उपमा बनवला जातो. तूमच्याही घरात असेच होत असेल तर ब्रेडच्या काही खास रेसिपी पाहुयात.

नाश्त्याला अनेक पारंपरिक रेसिपी केल्या जातात. त्यापैकी एक म्हणजे ढोकळा. ढोकळा ही गुजराती डिश असली तरी ती इतर राज्यातही आवडीने खाल्ली जाते. आपल्या घरातील शिल्लक राहीलेल्या ब्रेडपासूनही ढोकळा बनवला जातो. तो कसा ते पाहुयात.

ब्रेडचा ढोकळा

साहित्य

ब्रेड 5 तुकडे, दही १ कप, बारीक चिरलेली हिरवी मिरची, बारीक चिरलेले आले, हळद पावडर,हिंग,कढीपत्ता,मोहरी,चवीनुसार मीठ आणि तेल

सर्वात आधी दही घेऊन त्यामध्ये बारीक चिरलेली हिरवी मिरची, आले, हळद आणि मीठ घाला. हे तयार मिश्रण बाजूला ठेऊन द्या. आता ब्रेडचे स्लाईस घेऊन त्याचे समान चार भाग करून घ्या. गॅसवर कढई गरम करून त्यात तेल, हिंग, मोहरी आणि कढीपत्त्याची फोडणी करा. या फोडणीत ब्रेडचे तुकडे दह्यात बुडवून पॅनमध्ये ठेवा. दोन्ही बाजूंनी दीड ते दोन मिनिटे बेक केल्यानंतर गॅस बंद करा आणि सर्व्ह करा.

ब्रेडपासून टोस्टही बनवले जातात. त्यामुळे याच टोस्टमध्ये थोडा बदल करून त्यावर विविध भाज्या आणि रव्याची लेयर लावून टोस्टची पौष्टीकता वाढवली जाऊ शकते. ते कसे पाहुयात

व्हेजिटेबल रवा टोस्ट

साहित्य

ब्रेड तुकडे, रवा १ कप, दही अर्धा कप, बारीक चिरलेला कांदा, बारीक चिरलेली सिमला मिरची, बारीक चिरलेले गाजर, बारीक चिरलेला टोमॅटो, बारीक चिरलेली बीटरूट, बारीक चिरलेली हिरवी मिरची, बारीक चिरलेली कोथिंबीर, मीठ चवीनुसार, तेल

एका भांड्यात रवा, दही, अगदी बारीक चिरलेल्या सर्व भाज्या आणि मीठ टाकून मिश्रण एकजीव करून घ्या. पॅनवर थोडे तेल गरम करा. तयार केलेले मिश्रण ब्रेडच्या दोन्ही बाजूला लावून घ्या. दोन्ही बाजूंनी सोनेरी आणि हलके कुरकुरीत होईपर्यंत फ्राय करून घ्या.