Dasra special Recipes : दस-या निमित्त 'या' खास पदार्थांनी वाढवा सणाचा गोडवा

Dussehra Special Sweet Recipes : कोरोनाच्या दोन वर्षानंतर यंदा पुन्हा सणावाराला उत्साहात सुरूवात झाली आहे. त्यामुळे घरात छान पंचपक्वान्नांचे बेत रंगतात. तसे प्रत्येक सणाला घरातील गृहिणींची स्वयंपाक घरात विशेष रेलचेल असते. घरातल्या माणसांसाठी छान गोडा-धोडाचे बनवावे असाच त्यांच्या प्रयत्न असतो.

जर तुम्ही दरवर्षी तेच तेच गोड पदार्थ खाऊन कंटाळा आला असेल वा गृहिणींना तोच तोच पदार्थ बनवून कंटाळा आला असेल तर यंदा या झटपट आणि हटके अशा गोड पदार्थांच्या रेसिपीज अवश्य ट्राय करा.

मालपुआ

साहित्य

• १ वाटी मैदा

• १ वाटी खवा

• साखरेचा पाक

• तूप

• पिस्ता, बदाम, केशर

कृती

प्रथम पीठ तयार करा. यासाठी पिठात पाणी घालून मिक्स करावे. नंतर दुसरे पीठ बनवा ज्यामध्ये खवा आणि पाणी एकत्र करून मिक्स करा. आता ही दोन्ही पीठ एकत्र करा. ते खूप पातळ किंवा जास्त जाड नसावे. एका कढईत मंद आचेवर तूप गरम करा आणि आधी तयार केलेले पीठ गोलाकार पसरवा. मालपुआची एक बाजू शिजली की उलटी करून दुसरी बाजू शिजवा. मालपुआचा रंग बदलू लागला की कढईतून काढून गोड पाकात बुडवून घ्या. थोडा वेळ ठेवल्यानंतर ते बाहेर काढून प्लेटमध्ये ठेवा आणि ड्रायफ्रुट्सने सजवा.

नारळाची वडी

साहित्य

• किसलेला नारळ

• तूप

• खवा

• साखर

कृती

नारळाची वडी बनवण्यासाठी एका कढईत तूप आणि खवा मिक्स करून हलके तळून घ्या. नंतर गॅसवरून उतरवून थंड होऊ द्या. आता त्यात किसलेले खोबरे घाला. तसेच पाक बनवा. यासाठी कढई गरम करून मंद आचेवर पाणी आणि साखर शिजवा. एक उकळी आली आणि साखर विरघळली की आच वाढवा आणि घट्ट होऊ द्या. पाकाला तारा येऊ लागल्यावर गॅस बंद करा.

त्यात खव्याचे मिश्रण घालून चांगले मिक्स करा. लक्षात ठेवा की ही प्रक्रिया लवकर करावी जेणेकरून नारळ आणि खव्याचे मिश्रण पाकामध्ये सेट होईल. नंतर एका प्लेटमध्ये तूप टाकून खोबरे-खव्याचे मिश्रण जाडसर परतून घ्या. थंड होण्यासाठी प्लेटमध्ये ठेवा. त्यानंतर बर्फीला चाकूने हव्या त्या आकारात कापून घ्या. तुमची नारळ बर्फी तयार आहे.

जिलेबी

साहित्य

• १ वाटी मैदा

• दही

• तेल किंवा तूप

• छिद्र असलेले कापड

कृती

मैदा आणि दही एकत्र करून घट्ट पीठ तयार करा. नंतर साधारण सहा ते सात तास पीठ तसेच ठेवा. तोपर्यंत पाक बनवा. यासाठी पाणी, साखर मिक्स करून मंद आचेवर घट्ट होईपर्यंत शिजवा. पाक तारेतून सुटू लागल्यावर ते आचेवरून उतरवून थोडे थंड होऊ द्या. एका खोलगट कढईत तेल किंवा तूप गरम करून तयार पीठ कापडात भरा.

लक्षात घ्या छिद्र जितके लहान असेल तितकी जिलेबी पातळ होईल. हे पीठ गरम तेलात टाकून मध्यम आचेवर शिजवा. दोन्ही बाजूंनी हलका तपकिरी रंग आला की बाहेर काढून साखरेच्या पाकात सोडा आणि नंतर बाहेर काढून सर्व्ह करा.