Diwali Festival 2021: स्वादिष्ट बेसन लाडू, वाचा रेसिपी

दिवाळी सण हा सर्वांचा आवडीचा सण. हा सण काही दिवसांवर आलाय. अशावेळी प्रत्येक घरात फराळ बनवण्यासाठी घाई सुरु होते. यावेळी फराळामध्ये करंजी, बेसन लाडू, रवा लाडू, चिवडा, शंकरपाळी, चकली, शेव, अनारसे, असे अनेक पदार्थ बनवले जातात. पण दिवाळीत सर्वांचा आवडीचा पदार्थ म्हणजे 'बेसन लाडू'. चला तर जाणून घेऊया स्वादिष्ट बेसन लाडूची सोपी रेसिपी.

साहित्य:

- डाळीचे थोडेसे पीठ- चार वाट्या

- साजूक तूप किंवा वनस्पती तूप- दीड वाटी

- पिठीसाखर- साडेतीन वाट्या

- ड्रायफ्रुट्स

- एक चमचा उकळते दूध-अर्धी वाटी

कृती: सुरवातीला तूप किंवा डालड्यामध्ये बेसन तांबूस रंगामध्ये खमंग भाजून घ्या. भाजून झाल्यावर त्यात अर्धी वाटी उकळते दूध घाला. पीठ फसफसत असताना जाळीदार होऊन वर येईल. त्यानंतर पीठ कोमट झाल्यावर त्यात पिठीसाखर, वेलदोडा पूड घालून चांगले मळा. त्यामुळे लाडू चांगले मऊ होतात. लाडू वळताना त्यावर काजू पाकळी व बेदाणा लावून वळा.

टीप: याप्रमाणेच नाचणीच्या पिठाचे लाडू करता येतात. उन्हाळ्यात तब्येतीला हे लाडू चांगले असतात. लहान मुले, आजारी माणसे यांना पथ्याचे असतात. हे लाडू वनस्पती तुपात न करता साजूक तुपातच करावेत.

(संदर्भ: पुस्तक- मराठी सण...मराठी रेसिपी, सकाळ प्रकाशन, लेखिका-अश्विनी अजित डिके)